Bizi-Bizi Autonomia Sustatzeko Zentroan parte hartzeko deia zabaldu dute
Gaur [otsailak 19] egitasmoaren aurkezpen saioan eta ate irekien jardunaldian adindun asko elkartu dira, Anaitasuna jubilatuen elkartean.
Bizi Bizi proiektuaren aurkezpena Bizi-Bizi Autonomia Sustatzeko Zentruari bultzada bat eman nahi diote Berriatuan. Horretarako, aurkezpen saio eta ate irekien jardunaldia egin dute gaur [otsailak 19] Anaitasuna jubilatuen elkartearen egoitzan. Lagun eta familiakoen deiari erantzunez, asko izan dira aretoa bete duten edadetuak. Hain zuzen ere, saioaren helburua adinekoen parte hartzea handitzea izan da.
Saioak astelehen eta eguaztenetan egiten dituzte, 10:00etatik 13:00etara, jubilatuen lokalean. Hain zuzen ere, izena emateko aukera oraindik zabalik dagoela gogoratu dute. Udaletxeko sarrera egin daitekeela gogoratu dute. Era berean, nabarmendu dute ordutegiak moldagarriak direla, hau da, badagoela behar izan ez gero lehenago edo beranduago sartzeko eta ateratzeko aukera. Orain arte Bizi-Bizi Autonomia Sustatzeko Zentroak Elgoibarren eta Mendaron zabaldu dituzte. 20 eta 12 erabiltzaile dituzte, eta “erantzun oso positiboa” izaten ari direla diote.
Lea-Artibai Mankomunitatetik 2024ko urrian jarri ziren Berriatuko Udalagaz harremanetan Bizi-Bizi Autonomia Sustatzeko Zentroan proiektu froga pilotu bat egiteko. Mankomunitatetik esan zieten Berriatuko herria “aproposa” zela horrelako proiektu bat aurrera eraman ahal izateko. Udaletik proposamena “oso interesgarria” iruditu zitzaiela esan du Joseba Goienola herriko alkateak. “Herriko instalazioetara eta herritarrei egokitu behar ziren proposamenak ziren, baina ondo bideratuz gero udaletxeak proiektuaren ardura hartzea nahi zuena, Berriatuko adinekoen ongizatera bideratutako egitasmoa delako”.
Goienolak aitortu du herriko zaharrak herritarrik “onenak” direla: gutxi eskatu eta asko ematen dutelako. Horrenbestez, jasotako guztia itzultzeko saiakera batean, begi onez ikusi zuten udaletik Bizi-Bizi proiektua herrian sartu ahal izatea. “Beharrezkoa ikusi genuen aurrerapauso bat ematea eta herriko adinekoentzako eskaintza bat egitea. Autonomia lantzeko zentro bat baino gehiago da, azken batean astean bi aldiz goiz bat pasatzeko espazio bat da, burua eta gorputza lantzen diren bitartean gainera”, esan du Goienolak. “Adinak ekartzen dituen kontuak ahalik eta ondoen eraman ahal izateko proiektu bat da, horretarako bideratutako maila handiko profesionalekin”.
Alkateak onartu du hasiera batean azaltzeko zaila izan daitekeela, eta horregatik erabaki zutela herrira zabaltzeko aurkezpen saio bat egitea. Horretarako, Nora Etxebarria Bizitzen Fundazioko psikologoa eta saioetako gidaria ekarri dute gaurko [otsailak 19] saiora. Helburu argia jarraitu dute, berriatuar edadetu gehiago proiektura batzea.
Etxebarriak onartu du gizartean dagoen ideia dela zahartzarora heltzean eguneko zentroak edo erresidentziak bakarrik daudela. Horregatik, argi utzi nahi izan du alternatibak egon badaudela eta Bizi-Bizi Autonomia Sustatzeko Zentroa horietako bat dela. “Proiektuak zentro tradizional eta ohikoetatik aldendu gura du eta nagusiek adinagatik dituzten kontuak landu eta garatu, ez bakarrik gertatzen utzi”.
“Helburu nagusia adineko pertsonen bizi kalitatea eta itxaropena hobetzea, hau da, bizitzari bizia ematea, ez bakarrik urteak”
Zahartzaro aktiboaren garrantzia azpimarratu du psikologoak osasun fisiko, mentala eta funtzionala lantzeko. “Gizartearen parte izaten eta parte hartzen jarraitu behar dute adinduek, haien beharrak, nahiak eta gaitasunak kontuan hartu behar dira eta herrian zelan lagundu dezaketen aztertu”.
“Helburu nagusia adineko pertsonen bizi kalitatea eta itxaropena hobetzea, hau da, bizitzari bizia ematea, ez bakarrik urteak”. Arlo emozionala, funtzionalak edo fisikoak eta sozialak lantzen dituzte. Alde emozionalean, ongizate emozionala sustatzen dituzten jarduerak egiten dituzte, hau da, hauskortasun egoerari edo mendekotasuna hasteko prozesuei aurre egitea eta onartzea, “gaitasun kognitiboak mantentzea azpimarratuz”. Fisikoari dagokionez, ohitura osasungarriei buruzko jarduerak planteatzen dituzte saioetan, psikomotrizitate lodia eta fina landuz. Baina aldi berean gizarte plan bat ere jarraitzen dute, adinekoen harremanak eta sozializazioa sustatzen dituzte jarduerak antolatuz, jolasak batez ere.
