Etxegarai eta Mendizabal nagusitu dira Etxebarrian
Binakako Master Laboral Kutxa Txapelketaren finalaurrekoen ligaxka lehiatu zuten atzo Arrizabalagak eta Bergarak Etxegarai eta Mendizabalen aurka, eta 16-22 nagusitu ziren Etxegarai eta Mendizabal. Hala, azken jardunaldira arte itxaron beharko da Binakako Txapelketa Nagusiko finalerdiak zelan geratzen diren ikusteko.
Nora Mendizabal, Madalen Etxegarai, Arrate Bergara eta Olatz Arrizabalaga Etxebarriko partidua lehiatu aurretik. Emakume Master Cup Urrezko Liga —Binakako Master Laboral Kutxa Txapelketaren finalaurrekoen ligaxka— porrotez abiatu zuten Olatz Arrizabalagak eta Arrate Bergarak, baina egoerari buelta eman zioten bigarrenean. Atzo (martxoak 9), berriz, galdu egin zuten Madalen Etxegarai eta Nora Mendizabalen aurkako ligaxkako hirugarren partida Etxebarriko Txutxo udal pilotalekuan: 22-16.
Giro paregabean aritu ziren lehian pilotariak, eta frontoira gerturatu zen jendetzak ere goi mailako jaialdi batez gozatzeko aukera izan zuen. Izan ere, partidu erdira arte lehia “parekatua” izan zen, tantoak txandakatu zituzten, baina markagailuaren erdialdera ailegatutakoan, atzelarien arteko demak hartu zuen protagonismoa. “Hasieran nahiko hotz hasi ginen laurok, inor ez zen partidan sartu, eta norgehiagokaren erdira ailegatzerakoan hainbat huts egite egin genituen nahiko jarraian”, azaldu du Arrizabalak, eta, aurkariek abantaila hori aprobetxatzen jakin zutela gehitu zuen.
Izan ere, atzeko jokoa bilatu zuten orduan, eta Mendizabal Bergara baino gehiago izan zen; horrek Etxegarairi aurrean pilotaren bila sartzeko eta tantoak amaitzeko aukera gehiago eman zion. Pilotari gernika-lumotarra ahalegindu egin zen partidari eusten, baina bikote gipuzkoarra gehiago izan zen eta merezitako garaipena eskuratu zuen. “Atzeko jokoa kargatu zuten, eta pilota ere bizitu zenez, arazoak izan genituen. Nik ere ezin izan nion askotik lagundu Arrateri. Esango nuke eurek gu baino azkarrago jokatu zutela, euren estrategia hobea zela”.
Sailkapenaren zain.
Etxebarrian aritu ziren bi bikoteek dagoeneko jokatu dituzte fase honetako hiru partidak, eta biek puntu banagaz amaitu dute. Hala, asteburu honetan Zabaleta-Oses eta Arraiza-Gaminderen aurkako lehian gertatzen denaren arabera sailkatuko dira bikoteak; izan ere, Zabaletak eta Osesek bi partidatik bi irabazi dituzte, baina Arraiza eta Gaminde bitik batean gailendu dira.
Hala ere, asko pentsatu barik espero diete aurkariei Arrizabalagak eta Bergarak: “Finalerdietan edozer gerta daiteke. Bata zein bestearen aurka aritu, berdin-berdin topera atera beharko dugu”.
Gauzak horrela, estu-estu dago Urrezko Liga. Eta, gerta liteke lehen fasea lehen postuan amaitu zuten Arrizabalak eta Bergarak (jokatutako partida guztiak irabazi zituzten), datorren asteburuan Elgoibarren gertatzen denaren arabera, Urrezko Ligaxka hau azken postuan amaitzea eta finalerdietan kanporaketa zailenari aurre egin behar izatea. “Egia da lehen fase oso ona izan genuela, bitik bi irabazi genituen, eta gainera joko maila onean. Ligaxka honetan ez gara fin aritu, baina hobeto da fase txar hau orain pasatzea eta finalerdietara ondo ailegatzea”, adierazi du aurrelari gernika-lumotarrak. Ondorioz, horretarako, tentsioa berreskuratu behar dugu: “Biok dakigu finalerdietan beste modu batean kantxaratuko garela. Atzo tentsio falta hori igarri zen, baina finalerdietan topera kantxaratu behar gara, ezin dugulako partidu hori galdu. Egoera onean heltzen gara, eta alde horretatik lasai nago, ea irabaztea lortzen dugun”.
