Haurrentzako ginkana berdinzalea egingo dute Berriatuan
Martxoa (ere) feminista egitasmoaren baitan, domekan [martxoak 16] 17:00etan egingo dute.
Berriatuko Foro Feministak martxo osora zabaldu nahi izan ditu Emakumeen Eguneko ekintzak. Horretarako, Martxoa (ere) feminista egitasmoan elkartu dituzte guztiak. Hala, domekan [martxoak 16] ginkana berdinzalea egingo dute 17:00etatik aurrera.
7 eta 12 urte bitarteko umeentzako diseinatutako ekintza da, eta antolatzaileek zehaztu dute “ondo pasatzeko eta dibertitzeko” dinamikak direla, baina kasu horretan eduki hezitzaile bat sartu nahi izan dutela, “azken batean, hezitzailea den zerbaitek ez duelako zertan astuna edo aspergarria izan behar”. Horrenbestez, umeek ondo pasatzen duten bitartean, emakumeek historian zehar eduki dituzten lorpenak plazaratuko dituzte, eta «edonork lor dezakeela» erakutsi. Modu “transbertsal” batean egingo dutela esan dute, “elkarlana zutabe” izanik: “Probak beti taldean gainditzen dituzte, elkarlana bilatzen dugu beti”.
Ez dituzte probak aurreratu nahi izan, baina “denetarikoak” izango direla adierazi dute. Helburuei dagokionez, emakumeen lana goraipatu nahi dute: “Euskal Herrian pertsona garrantzitsu asko eduki ditugu, eta egun ere baditugu. Hauetako asko emakumeak dira, baina askotan ahaztuak edo bidean galduak izan dira. Hauek gogora ekarri eta haurrei ezagutarazi nahi dizkiegu, beraiek ere nahi duten hori izan daitezkeela erakusteko eta era desberdinetako erreferenteak eduki ditzaten”.
Eskolatik kanpo
BATU proiektuaren baitan sortutako ekimena da, eta 2024. urte amaieran sortu zuten. Ordura arte, ikastetxeetan tailerrak ematen zituzten, betiere genero berdintasunagaz eta aniztasunagaz zerikusia izanik: “Eskolatik kanpo, modu ludikoago batean, gaia lantzeko erronka hartu genuen eta gaur egun biak uztartzen ditugu. Oso gustura gaude jasotzen ari garen erantzunagaz, eta haurren aldetik ondo pasatzen dutela esan digute”.
