Berriatuak euskara sustatzeko plan estrategikoa martxan jarri du
Herritarrentzako galdetegia sortu eta zabaldu dute, martxoaren 26ra arte bete daitekeena. Apirilaren 3an bilera egingo dute.
Azken datu ofizialen arabera, Berriatuan %82,9ak dakite euskaraz, euskaraz bizi da Berriatua, eta horrela jarraitu nahi dute. Hala ere, Berriatuko Udalean jakitun dira gaur egungo euskararen tendentziaz eta errotik hartu nahi izan dute. Kaleko eta etxeko erabileran jaitsiera nabarmena egon da 2017tik 2021eko datuetara, aldaketa “nabarmena” dela diote. Horregatik, euskara sustatzeko plan estrategikoa martxan jarri dute.
“Gure bizimoduan aldaketa handiak gertatu dira urteotan, eta hurrengoetan ere gertatuko dira: harreman ereduak, teknologia berriak, biztanle mugimenduak… Aldaketa horiek guztiek zuzenean eragiten diote hizkuntzari, eta, globalizatutako mundu honetan, ezinbesteko izango zaigu euskararen aldeko hautua egitea”, adierazi dute.
Hain zuzen ere, plan estrategikoaren lehen pausoa galdetegi bat zabaltzea izan da. Galdetegia martxoaren 26ra arte [eguaztena] bete daiteke, online egin daiteke edo bestela paperean bete eta udaleko postontzian utzita. “Euskarari buruzko galdera batzuekin osatutako galdetegia da, azkar betetzekoa. Ezinbestekoa da herritarren iritzia jasotzea”, azaldu dute.
“Euskarari buruzko galdera batzuekin osatutako galdetegia da, azkar betetzekoa”
Horrez gain, parte hartze saioak egingo dituzte “plangintzaren estrategiak zehaztu eta ekintzak identifikatzeko”. Lehendabizikoa, apirilaren 3an egingo dute, 18:00etatik 19:30era, udaletxean.
“Erakundeok ere badugu zer egina: euskaraz egiteko aukerak zabaltzea eta bultzatzea, eta erraztasunak ematea herritar eta eragileei. Hori da Berriatuko Udalaren konpromisoa”, diote. Hain justu, bide horretan sakontzeko eta aurrean dituzte erronkei “egoki erantzuteko” plangintza bat aurrera eramatea garrantzitsua dela diote.
“Euskararen zabalkunde, garapen eta normalkuntza lanetan ibili direnei esker, egungo euskaldun gehienak euskaraz bizi gara. Jaso dugun lekukoa, gure gurasoengandik, arbasoengandik eta erroetatik datorkigu. Familia, ikasketak, lagunak, aisia, lana… alor guztietan gara eta izan gaitezke euskaldun. Baina euskararen erabilera jaitsi egin da gure kaleetan. Orain, euskarak, gu behar gaitu. Gu gara lekuko horren eredu eta ondorengoentzako adibide”.
