Zaldi mando eta Kinttopeko lehiaketetan, Gaztiñei nagusi

2025/03/25

Iragan asteburuan (martxoak 22 eta 23) Zaldi mando probak ikusteko aukera izan zen Aulestin. Izan ere, Jabier Urberuaga eta Juan Felix Antsotegi Antso memoriala lehiatu zuten zapatu eta domekan, Zaldi Mando eta Kinttopeko lehiaketetan. Zortzi izan ziren lehenengoan parte hartu zutenak; lau zapatuan, eta beste lau domekan. Markina-Xemeingo Gaztiñei izan zen nagusi sariketa bietan, 61 plazako markagaz. Zaldi Mandoen Txapelketan, Aulestiko Udalaren mantaz gain, urdaiazpikoa eta 800 euroko saria eskuratu zituen, eta Kinttopekoan, partaide bakarra izan zenez, Ilunzar tabernak emandako manta eta 300 euroko saria jaso zituen.

Enkarterri Turf Power (Zalla) izan zen Zaldi Mandoetako bigarren saritua 60 plaza eta 3,30m-ko markarekin, eta 700 euroko saria irabazi zuen. Fikako Gartziar sailkatu zen hirugarren (56 plaza), eta 650 euro jaso zituen. Laugarren postua Fermin Santamariak (Guriezo) eskuratu zuen, 600 eurogaz batera, 54 plazako markagatik. Etxekoak bosgarren postua lortu zuen; Ibekohondok 53 plaza, 1/2-5,90m-ko marka egin eta 550 euro eskuratu zituen. Etxetxo (Zumaia), Jose A.Lopez (Laudio) eta Talaia Jatetxea (Zumaia) izan ziren seigarren, zazpigarren eta zortzigarren sailkatuak, 500, 450 eta 400 euroko sariak jasoz.

Aulestiko harria erabili zuten partaideek, 1.050 kilokoa, eta Bizkaiko Kirol Federazioak kontrolatu zituen bi saioak. Epaile lanak Imanol Erleagak eta Ainize Perezek egin zituzten. Antolatzaileak “balorazio ona” egin dute: “Zapatu gauean jende gutxiago hurbildu zen, baina domekan hainbeste jende batu ginen. Orokorrean, giro oso ona egon zen, eta balorazio ona egiten dugu”.