Hasi dira 'Bereizi eta Irabazi' birziklapen kanpainaren emanaldi parte hartzaileak
'Bereizi eta Irabazi' birziklapen kanpainak helburu argi bat du: eskualdearen etorkizuna jasangarriagoa bihurtzea. Hori ardatz izanik, emanaldi parte hartzaileak antolatu dituzte herri desberdinetan, eskoletan antolatutako erronken ostean.
Etxebarria izan da emanaldi zikloekin hasten lehena. Lea-Artibaiko Mankomunitatea. Lea-Artibai eskualdeko Mankomunitatea Bereizi eta Irabazi kanpainan murgilduta dago guztiz. Etorkizun jasangarriago baterantz aurrera egitea jomuga izanik, herritar guztien lankidetza berebizikotzat dute, “guztion artean” eskualdea birziklapenaren eredu bihurtzea bilatuz. Hori horrela, kanpainaren baitan emanaldi parte hartzaile bereziak proposatu ditu mankomunitateak eskualdeko herrietan.
Urtarrilean eman zioten hasiera erronkei, eskualdeko ikastetxeetan. Iragan astean, ordea, herrietako emanaldiekin hasi ziren; Etxebarria eta Ondarroa izan dira emanaldi horiek hartzen lehenak, hurrenez hurren. Bihar (apirilak 4), ostera, Markina-Xemein izango da jasangarritasunean murgilduko den herria; 17:15ean jarri dute hitzordua, Arkupeetan. Hurrengoak, Berriatua (apirilak 10), Ziortza-Bolibar (apirilak 11), Ispaster (maiatzak 2) eta Lekeitio (maiatzak 3) izango dira. Herritarren parte hartzearekin eta elkarrekin lan egitearekin eskualdeak ingurumenarekiko duen konpromisoa erakustea dute helburu topaketa hauek, azaldu dutenez.
Alegia, eskualdeko egungo egoera plazaratu dute kanpainaren nondik norakoak azaltzen dituen webgunean: “Lea-Artibain hondakinen sailkapen tasa %42koa da, Europako helburua %65 izatea den horretan. Errefusa hondakinak guztizkoaren %56 dira, eta horien kudeaketak honakinen aurrekontuaren %60 xahutzen du”. Aldaketan sinesten dute, beraz, eskualdearen ongizatea zaintzeko: “Errefusa gutxitzeak eta birziklapenak gastu publikoetan aurreztea dakar. Diru hori gure herrietan proiektu berritzaileak finantzatzeko erabil dezakegu. Jasangarritasunaren eredu izateko aukera dugu”.
Aldaketa, “orain”. Lurraldeak ingurumenarekiko ahalegina merezi duela defendatzen du Berezi eta Irabazi kanpainak. “Hondakinak ondo bereizteak gure paisaiak eta biodibertsitatea zaintzen lagunduko du. Gure kaleak, kostaldea eta mendialdeak garbiago egongo dira”, gaineratu dute. Gainera, jasangarritasunaren eta ingurumeraren zaintzaren aldeko aldaketa hori “orain” hasi behar dela nabarmendu dute, “herritar bakoitzak bere harri-koskorra jarriz, eskualdea indartzea lortzeko”.
