Oiz tontorretik zabalduko dute deiadarra
Deiadar Mendien Egunaren 20. aldian bilduko dira mendizaleak domekan, Oizen. 2004an Deiadar Mendien Egunaren lehen aldirako berariaz prestatutako adarra joko dute.
Oizen ospatuko dute Deiadar Mendien Egunaren 20. aldia domekan. Handik egingo dute Bizkaiko Batzar Nagusietarako deia, antzina egiten zuten legez. Izan ere, Batzar Nagusietara deia egiteko tradizioa gogorarazteko eguna da, eta adarren soinuak indarrez entzungo dira, berriro, Oiz mendiearen tontorretik; 2018an entzun ziren azken aldiz bertatik. Gainera, aurten, beste garai batzuetako kontakizun «erromantikoak gogora ekartzeko» jardunaldian, 2004an Deiadar Mendien Egunaren lehen aldirako berariaz prestatutako adarra erabiliko dute: 12:00etan joko dituzte adarrak.
Durangoko Alpino Tabira mendi taldea da aurtengo ibilbidearen arduraduna, eta jakinarazi dutenez, ibilbide zirkularra izango dute, Garai herritik abiatu eta bertan amaituko dena. 09:00etan abiatuko dira mendizaleak, eta, iparraldetik Kantauri itsasoaz eta hegoaldetik Bizkaiko barrualdeaz gozatzeko aukera izango dute, «paisaia ederrak ezagutzekoa».
Sollube, Gorbeia, Kolitza, Ganekogorta eta Oiz dira Bizkaiko bost deiadar mendiak, eta aurten Oizera joateko tokatzen da; iazko edizioan ehunka lagun joan ziren Sollubera, eta aurten erantzun bera espero dute. Gainera, antolatzaileek jai gune txiki bat ere prestatu dute, tontorretik gertu dagoen baselizan, jai giroak bertan jarrai dezan.
Ekitaldian, Alpino Tabira mendi taldeak Ganekogorta mendirako igoera antolatzeko Gailurra klubeko ordezkariari emango dio lekukoa, hori baita datorren urterako aurreikusitako tontorra.
