TindEHEr, euskal gazteak saretzeko tresna berria
Gazte Euskaltzaleon Sareak eta Euskal Herrian Euskarazek aurkeztu dute eta helburu dute lurralde desberdinen arteko harremanak sustatzea.
AurkezpenaEuskal Herrian Euskaraz Izenak bestelako pentsatzera eramaten badu ere, ThindEHEr proiektuak bestelako helburuak ditu. Gazte Euskaltzaleon Sareak eta Euskal Herrian Euskarazek garatutako tresna da eta helburu dute “euskararen hizkuntza kontzientzia handitzea, pedagogia politiko euskaltzalea egitea, eta eremu soziolinguistiko desberdinetako gazte militante antolatu euskaldunen arteko harremanak sustatzea”.
Izan ere, “beharrezkotzat” jo dute gaur egungo testuinguruan aurrerapauso bat ematea. Sortzaileek uste dute Euskal Herrian oro har, eta gazteriarengan espezifikoki, azken urtetan “euskararen egoeraren ustezko normalizazio baten ilusioa” zabaldu dela, besteak beste, “hizkuntza eta nazio auzien inguruan despolitizazio-joera nabarmen bat gertatu den aldi berean”. Alde horretatik, Euskal Herriko eskualdeen arteko harremanak eta loturak, bereziki Iparraldearen eta Hegoaldearen artekoak, “aurretik ere urriak baziren”, are eta gehiago lausotzen ari dela uste dute.
Horregatik, gaztetxe, gazte asanblada, gazte mugimendu eta bestelako gazte talde eraldatzaileen artean harreman informalak sortzen laguntzeko proiektu sortu dute. Eragile desberdinen arteko senidetzak sortu nahi dituzte, denboragaz “harreman iraunkor baten” bilakatuko direnak. Hain zuzen ere, dinamika informalak eratu nahi dituzte, eta gero horiek herrietara ireki.
Horretarako, irizpide desberdinak ezarri dituzte: Iparralde eta Hegoaldeko herrien arteko loturak sortzea eta euskararen arnasgune (herririk euskaldunenak) eta ez oso euskadunen artekoak. Hau da, gehienbat “tipologia ezberdina” daukaten herriak jarriko dituzte elkar harremanetan. Horrez gain, adierazi dute egoera politikoaren jakitun izanik, kontutan hartuko dituztela eragileen baitan dauden “joera politiko desberdinen arteko osaketa, aldebiko harreman erosorako baldintzak sortzeko”.
Helburu zehatzagoak ere badituztelako. Batetik, eremu soziolinguistiko desberdinetako gazte euskaldunen arteko harremanak sustatzea,” informaltasunetik, aisialdia eta lanketa euskaltzalea uztartuko dituen egunak” antolatuz. Bestetik, elkarrekiko ezagutza horretatik, euskararen hizkuntza-kontzientzia handitzea, baita pedagogia politiko euskaltzalea egitea eta euskal kultura sustatzea.
Horretarako, Euskal Herrian Euskarazen webguneko formularioa betetzea besterik ez dago eta bakoitzaren ‘matxa’ ikusi, bi herrietako batean euskara ardatz izango duen egun osoko egitaraua antolatzeko.
