Itxaropenaren hariari tinko helduta, Ondarroa eta Lekittarra aurrera
Lekittarra eta Ondarroa, borrokan eta irmo, Getxo eta Castroko uretan; Oriok, berriz, bandera bana eta alde nabarmena sailkapenean
Argazkia: Bermeo Arraun Argazkiak Eusko Label Ligako asteburuak bi estropada garrantzitsu utzi ditu: Getxoko XLVII. Ikurriña, larunbatean; eta XIII. CaixaBank Bandera, igandean, Castro Urdialesen. Bi egunetako irabazlea Orio izan da, eta gipuzkoarren nagusitasuna geroz eta nabarmenagoa da. Baina goiko postuetatik urrun ere bada zer kontatu: Lea-Artibaiko ordezkariak, Lekittarra eta Ondarroa, irmo ari dira ligan tinko eusten.
Ondarroa: etengabeko hobekuntzaren bila. Ondarroako traineruak lan serioa egin du bi estropadetan, etxetik urrun, baina jarrera sendoarekin. Getxon, lehen txandan bigarren izan zen, San Juanen atzetik, eta 20:43 denborarekin helmugaratu zen, Kaiku eta Cabo atzean utzita. Igandean, Castroko estropada eremuko baldintza aldaketek mesede egin zioten Ondarroari. Lehen tandako denbora onena lortu ostean, 6. postua lortu zuten sailkapen orokorrean. Zierbena eta Urdaibai bezalako ontziak atzean izan ziren, erakutsiz txanda aldeko baldintzak erabakigarriak izan zirela. Mailari eusteko lehian, ontzi ondarrutarrak indarberrituta jarraitzen du, azken laurenen artean lehiatzen bada ere, egunetik egunera segurtasun handiagoz.
Argazkia: Bermeo Arraun Argazkiak
Lekittarra: bigarren txandako ofizioz. Lekeitioko ontzia, berriz, bigarren txandan aritu zen larunbatean, eta Urdaibai eta Getariaren atzetik, hirugarren postuan amaitu zuen (20:41), Ares mendean hartuta. Emaitza horrek taldearen oreka erakutsi zuen. Igandean, Castroko baldintza irregularrak zirela eta Lekittarrak 11. postuan amaitu zuen estropada, azken aurreko postuan, baina oraindik mailari eusteko borrokan oso lehiakor dago. Egun txarrak ere pasatzen dira, baina taldeak erakutsi du borrokatzeko gertu dagoela.
Argazkia: Bermeo Arraun Argazkiak
Oriok jauzia egin du, Zierbenak huts. Goiko aldean, Oriok estropada biak irabazi ditu, eta horrekin batera sailkapenean jauzi esanguratsua egin du. Getxon ez zuen areriorik izan: 19:43ko denborarekin, Zierbena 11 segundora utzi zuen eta Donostiarra 18ra. Castron, berriz, lehiarik estuena eskaini zuen Donostiarrarekiko, baina azken metroetan Gorka Aranberriren ontziak bandera poltsikoratu zuen seigarrenez. Zierbenak, aldiz, egun beltza izan zuen igandean: bederatzigarren amaitu zuen, eta 8 puntu galdu zituen Oriorekiko. Hala, Orio 16 puntura da Zierbenarekin alderatuz eta 18ra Donostiarrarengandik, bi estropadaren faltan denboraldiaren ekuadorera iristeko.
Asteburuak utzi duena argi dago: Orio liga eskuratzeko bidean doa, baina beheko aldean, eskualdeko taldeek beren burua defendatzen jarraitzen dute, une on eta txarrekin, baina beti lehiatzeko prest. Hurrengo geldialdia berriro ere funtsezkoa izango da Ondarroarentzat eta Lekittarrarentzat: jaitsiera zuzena ekidin beharra dago, eta Lea-Artibaiko ontziak ez dira kikiltzen.
