Baserritarren azoka egingo dute Ondarroan
Lea Artibaiko eta inguruko ekoizleek beren produktuak saldu eta ezagutzera emango dituzte Itsasaurre plazan, goizeko 10:00etatik arratsaldeko 15:00etara.
Xemeingain baserriko Alejandro Arrieta Lekeitioko Santo Tomas Azokan. Bihar [abuztuak 2], baserritarren azoka egingo dute Ondarroako Itsasaurre plazan. Goizeko hamarretan zabalduko dituzte postuak, eta 15:00ak arte egongo dira zabalik. Ondarroako Udala eta Lea-Artibai Fundazioa dira ekimenaren antolatzaile nagusiak, eta BBK ere aritu da laguntzaile lanetan.
Azokaren helburu nagusia da tokiko produktuen kontsumoa sustatzea, eta, bide batez, eskualdeko ekoizleen lana balioan jartzea. Horretarako, Ondarroako eta inguruko ekoizleak bertaratuko dira, euren produktuak saltzera eta herritarrekin harreman zuzena izatera. Hala, herritarrek aukera izango dute KM0 produktuak bertatik bertara erosteko, eta ekoizleen lanaren inguruko informazioa jasotzeko.
Azokan elikagai anitz egongo dira eskuragarri: barazkiak, ogia, gazta, lekaleak, kontserbak eta bestelako lehen sektoreko produktuak. Horrez gain, azokak tokiko nekazaritza eta abeltzaintzaren aniztasuna erakusteko balioko du, eta herritarren eta ekoizleen arteko harreman zuzena sustatuko da.
Ekimen hau Lea-Artibaiko Hamen Bertokoa egitasmoaren baitan kokatzen da, eta tokiko kontsumo ohiturak indartzeko urrats praktiko gisa aurkeztu dute antolatzaileek.
