Baserriko zaporeak eta eskuekin egindako altxorrak, Lekeitioko bihotzean
Baserri Azoka egingo da bihar (abuztuak 9), Lekeition. Azoka Indepentzia plazan egingo da, eta bertan 18 ekoizle eta 9 artisau bilduko dira egunean zehar.
Ekimen hau Hamen Bertokoa eta Lea Artibaiko Landa Garapen Alkarteak antolatu dute, Lekeitioko Udalarekin batera. Tokiko eta inguruko produktuak eta artisautza lanak ezagutarazteko helburua du azokak, baita kontsumo arduratsua eta tokiko ekonomia sustatzeko ere.
Azokan elikagaiak eta eskulanak izango dira protagonista. Nekazari eta abeltzainen ekoizkinak eskuratzeko aukera izango da, hala nola esnekiak, gaztak, eztia, barazkiak, ogia eta gozoak. Horrez gain, artisau lanetan aritzen diren inguruko produktoreek beren piezak erakutsiko dituzte, zurezko eta ehuneko lanak, zeramika eta bestelako produktuak barne.
Horrelako azokek tokiko ekoizpena ikusgarri egin eta bertako merkataritza indartzeko balio dute, eta herritarrei kalitatezko produktuak zuzenean ekoizleari erosteko aukera ematen diete.
Azoka bihartik aurrera zabalik egongo da plazan, eta antolatzaileek herritarrak zein bisitariak gonbidatu dituzte bertara hurbiltzera eta giroa bizitzera.
