San Antolinak 2025: bizikidetzan eta auzolanean oinarritutako jaiak
Argazkia: Lekeitioko Udala Lekeitiok prest ditu aurtengo San Antolin jaiak. Irailaren 1etik 8ra ospatuko dira, eta herriko kaleak musikaz, bazkariz, ikuskizunez eta ekitaldiz beteko dira. Egitarauak adin guztietarako proposamenak jasotzen ditu, eta udalaren mezua argia da: jaiak guztiontzako dira, eta errespetuzko giroan bizitzeko deia egin diete herritar eta bisitariei.
Kalean dagoeneko nabaritzen da jai giroa: kuadrillak mozorroak prestatzen ari dira bajadarako, eta antzarretako potinenta ospetsuak ere antolatzen dabiltza. Herriko elkarteak eta udala azken xehetasunak lotzen ari dira, auzolanari esker.
Ander Aldazabal alkateak nabarmendu du aurten bizikidetzari eta guztion parte hartzeari eman nahi diotela garrantzia: «Haur, gazte, heldu eta nagusi, denok dugu kalean eta elkarren ondoan ospatzeko eskubidea. Helburua da jaiak guztiontzat atseginak izatea, zarata eta jende pilaketa direla-eta askok atzean geratu behar izaten duten arren».
Aurten, gainera, testuinguru berezia izango dute San Antolinek: Lekeitiok 700 urte bete ditu hiribildu gisa. «Zer ospatua badaukagu —adierazi du alkateak—: gure nortasunetik, euskaraz eta auzolanean, kantuz eta bakarrik dagoenari eskua luzatuz».
Udalak eskerrak eman dizkie jaietako programazioa osatzen eta giroa sortzen laguntzen duten talde, elkarte eta norbanako guztiei: herri-bazkariak, kalejirak, kontzertuak eta txapelketak posible dira herritarren auzolanari esker.
Bestalde, mezua garbia da: erasotzaileek ez dute lekurik jaietan. San Antolinak askatasunean eta errespetuan ospatu nahi ditu Lekeitiok, eta herritarrei giro hori bermatzeko gonbita egin diete.
Udalak ongietorria luzatu die herrian erroldatu berri direnei ere, eta gogora ekarri ditu jaietan parte hartu ezin dutenak: lanagatik, osasunagatik edo bestelako arrazoiengatik kanpoan daudenak.
Irailaren 1ean piztuko da txupina, eta hortik aurrera, aste osoz, herria festaz jantziko da.
