Gernika-Palestinak kazeroladak deitu ditu irailaren 5erako, Gazako egoerak okerrera egin duelako
Gernika-Palestinak kazeroladak deitu ditu Euskal Herri osoan irailaren 5ean, Gazako egoerak okerrera egin duelako eta Europak ez duelako ezer egin
Gernika-Palestina mobilizazioa Donostian. Gernika-Palestina herri ekimena. Gazako egoerak “okerrera” egin duela eta Europak “ez duela ezer” egin aintzat hartuta, Gernika-Palestina deialdi herritarrak kazeroladak deitu ditu irailaren 5erako (barikua); 19:00etan jarri dute ordua udaletxe guztien aurrean edo herri bakoitzean “egokien” ikusten den tokian: “Gizarte eragile guztiei, eta euskal gizarteari oro har, dei egiten diegu Palestinari elkartasuna adierazten eta justiziaren eta bakearen alde egiten jarrai dezaten”.
Izan ere, “sumintasunez” bizi dute Palestinako herriaren aurkako genozidioa gogortu izana. Gazako azpiegitura guztiak sistematikoki suntsitu eta gero, Israelek jarraitzen du palestinarrak erasotzen: “Gainera, gosez eta egarriz hiltzen ditu, eta erortzear dauden ospitaleei sistematikoki erasotzen die, genozidioa munduari transmititzen dioten komunikabideetako ehunka langile hilez”.
Ondorioz, Gernika-Palestinak uste du badela unea Israel eta Benjamin Netanyahu “berehalako su etena aldarrikatzera” behartzeko. Negoziazioaren bideari ekiteko, Gazatik erretiratzeko, premiazko laguntza humanitarioa ez oztopatzeko eta desnutrizioaren aurka borrokatzeko momentua ere badela diote, baita Israel eta Netanyahu gutxieneko bizi baldintza duinak ziurtatzeko azpiegiturak berreraikitzera behartzeko unea dela ere.
Deialdi herritarreko kideek uste dute Europar Batasunak eta hura osatzen duten estatuek “tresnak” dituztela Israelgo Gobernuaren jarreran “nabarmen” eragiteko: “EB eta bere estatu kideak dira Israelen lehentasunezko merkataritza bazkidea eta arma hornitzaile nagusienetakoak”. Ondorioz, gaur egun Israelekin dituzten harreman instituzional, komertzial, kirol harreman eta mota guztietakoak amaitzeko eskatu diete: “Ekintzaren unea da: harreman komertzialak hausteko eta Israel isolatzeko zigorrak abian jartzeko unea da. Hori ez egitea munduaren aurrean gure burua gutxiestea eta etorkizuneko belaunaldien aurrean erretratatzea da”.
