Euskaragileen Topaketa egingo dute urriaren 9an Cikautxon
Bai Euskarari Elkarteak antolatzen du eta euskararen sustapena indartzeko helburua dauka. Izen ematea zabalik dago.
Euskaragileak Irizar Bai Euskarari Elkarteak kudeatzen duen Euskaragileak batzordeak Berriatuko Cikautxon antolatu du hurrengo Euskaragileak Topaketa. Urriaren 9an 09:00etatik 11:30era egingo dute eta helburu dute “enpresetan euskararen kudeaketan aurrera egiteko eredu praktiko eta inspiratzaileak ezagutzera ematea”. Izen ematea “irekia” dela nabarmendu dute eta horrenbestez, edozein enpresa edo entitatek parte hartu dezake. “Topaketa enpresen arteko harremanak sendotzeko eta gure esperientziak partekatzeko plaza ezin hobea da”, diote.
Ekitaldiari hasiera emateko, Cikautxoko arduradunen batek hitz egingo du, eta jarraian Bai Euskarari Elkartekoek hartuko dute hitza Euskaragileen batzordea nortzuk osatzen duten edota haien helburuak azalduko dituzte. “Helburuak tokian tokiko desberdinak izan badaitezke ere, azkenean zonalde bakoitzean euskararen egoera desberdina delako, beti saiatzen gara euskara sustatzen enpresetan, jardueren bidez edo Euskara Planak aurrera eramateko proposamenak eginez”, azaldu dute.
2024ko otsailean egin zuten azken topaketa Irizarren. Bertan, batez ere, Euskara Planen sustapenean oinarritu ziren, baina Berriatuan helburu “xumeagoagaz” etorriko direla esan dute. “Zure erakundean euskararen erabilera sustatzeko ideien bila bazabiltza edo beste enpresa batzuen esperientziak ezagutu nahi badituzu, aukera paregabea da”. Hau da, nahi dutena da euskaren erabileraren eta sustapenaren inguruan pausoak eman. “Esperientziak partekatu nahi ditugu, dagoeneko fase aurreratuago batean daude enpresek hitz egingo dute, baina, era berean, hastapenetan daudenei ere ahotsa emango diegu, haien bizipenak edo trabak ikusi ahal izateko”.
Lantegi Batuak edo Lekeitioko Traola Produkzioak dira hitz egingo dutenetako batzuk. Gero, izen emate kopuruaren arabera, multzo txikietan Cikautxotik bisita gidatua egingo dute, “bertatik bertara ezagutzeko haien hizkuntza kudeaketa eredua”.
