232 herritar elkartuko dira Kuadrilla Egunean
Behin izena emateko epea amaituta, 15 kuadrillak eman dute izena zapaturako [urriak 4].
Ispaster Kuadrilla Eguna herritarren jai nagusienetakoa da, guztiak elkartzeko eta eguna batera pasatzeko eguna. 17. Kuadrilla Eguna ez da gutxiagorako izango, 232 lagun elkartuko dira zapatuan [urriak 4]. Hau da, jai eguna herrian indartzen doanaren seinale da iaz baino herritar gehiagok eman dutela izena, guztira 15 kuadrillak.
Ondo dabilena ez aldatzeko esan ohi da, eta Ispasterko Udaleko kultura eta jai batzordeak ez du aldaketa nabarmenik egin egitarauan. 10:00etan dago jarrita hitzordua bazkarirako prestaketekin hasteko, kuadrilla bakoitzeko bi lagun aurkeztu beharko dira. Bolo jolasa Kuadrilla Egunean hutsik egiten ez due ekintza horietako bat da. Duela bi urte lehen aldiz umeentzako antolatu zuten goizean, eta harrera ona ikusita, aurten ere errepikatuko dute, 12:00etan.
14:30ean bazkaltzeko elkartuko dira. Gero, antolatzaileek gogoratu dute kuadrilla bakoitzak bere mahaiak batu beharko dituela eta erabilitako platerak eta mahai tresnak garbitu eta gorde. Eguraldiari begira daude dagoeneko, baina aurreikuspenak onak direla diote. Berritasun modura, bingo musikatua egingo dute bazkalostean, 17:00etan, eta bi otzara zozketatuko dituzte. 18:00etan hasiko da nagusien bolo txapelketa, bakarkako lehiarako 2 eurokoa izango da izen ematea, eta binakakoan, betiere mistoak, 4 euro. 21:30ean, berriz, txapel jaurtiketa lehiaketa egingo dute, hemen ere bikoteak mistoak izan beharko dira, eta parte hartzeko prezioa boloetako berdina izango da: 4 euro.
