20 urte Mutriku kontatzen
Beti mirestu izan dut borondatez diharduten herritarren lana. Ederra da jendeak sinesten duten horretan bere alea jartzea: herrigintza, euskalgintza, gaztetxeak, bertso eskolak, antzerki taldeak, herri mugimenduak, eta, nola ez, herri aldizkariak.
2002an eman zituen lehen hegalkadak Kalaputxi Mutrikuko herri aldizkariak, 10 urte nituen nik garai horietan. Ez ditut gogoan aldizkariko lehen aleak, baina atzera begira, iruditzen zait beti egon dela hor. Eta, hala da. 20 urtez iritsi zaizkigu hilero herriko berriak buzoietara, are gehiago, urteren batean guk geuk sartu ditugu buzoietan. Izan ere, gogoan dut Institutuko garaietan etxez etxe Kalaputxi banatzen aritzen ginela, kurtso bukaerarako diru pixka bat ateratzeko asmoz. Han irabazitakoak xahutu genituen, besteak beste, Saloun eta Mallorcan. Hala ere, ezbairik gabe, herritarrei herritarren berri ematea beste asmorik ez duten horien indar, gogo eta ahaleginei esker egin du aurrera 20 urte hauetan, eta ez dago hori guztia eskertzeko hitzik.
Inoiz kazetaritza lanean aritu denak badaki zenbat lan dagoen elkarrizketa, erreportaje, kronika eta albiste bakoitzaren atzean, baita zeuk idatzi gabekoetan ere. Nire gaurko zutabea izan daiteke horren adibide: kolaboratzaileak lotu, egutegiak osatu, tokatzen zaigun astearen aurreko astean abisua pasa, idatziak errepasatu, maketatu… pentsa euren buru eta eskuz sortutako testuetan. Gaiak mimoz aukeratu, lekuak esleitu, elkarrizketak egin, herriko albisteak zerrendatu, idatzi, errepasatu, argazkia aukeratu, atera, maketatu… eta goazen berriro astera. Hilez hile, 20 urtez.
Zenbat bizilagun eta herrikide ezagutu ote ditugun 20 urte hauetan Kalaputxi-ko azalen bitartez. Kalean gurutzatu eta bi hitz egitetik haratago ezer gutxi dakigun jendea ezagutarazi diguzue, urruti zegoena gerturatu eta gertu genuena ezagutarazi. Influencer-en eta globalizazio frenetikoaren garaiotan, albokoari begiratzeko parada eskaintzea, ez da erronka makala, eta hori 20 urtez egiteak ez dauka parekorik.
Mutrikuarrez zein euskara batuan goxatu dizkiguzue begi-belarriak: irakurri ditugu artikuluak, kantatu ditugu bertsoak, ezagutu ditugu garai urrutietako mutrikuarrak, zoriondu ditugu lagunak, idatzi ditugu kexak eta omenaldiak. Zuek egina den arren geure egin dugu. Eskerrik asko, eta ea beste 20 urtez elkarrekin hegan jarraitzen dugun!
