Pili Robles: 'Bat-bateko bankuak'
Lekeitioko saihesbidetik paseoa emateko ohitura daukatenek, atzo bertatik pasatu baziren, jarraian konturatuko ziren zerbait berria zegoela. Pozteko berrikuntza da eta erabiltzaile guztientzako mesedegarria gainera. Bertatik pasatzeko ohitura ez duzuenontzat esan behar atzo, ekainak 22, Lekeitioko saihesbidean bankuak ipini dituztela.
Idatzi honen bitartez hausnarketa txiki bat egitera gonbidatu nahi zaituztet. Lekeitioko saihesbidea ez da atzokoa; urte batzuk baditu. Saihesbideko erabiltzaileak berdinak direla esango nuke, hau da, lekeitiarrak. Non ote dago desberdintasuna Lekeitioko udalean agintzen zegoen EAJak saihesbidea inauguratu zuenetik gaur egunera, bat-batean, egun batetik bestera, denontzako mesedegarriak diren bankuak jartzeko?
Buruari buelta gehiegi eman gabe erantzuna ezpainetara ailegatzen da. Desberdintasuna, alde batetik, gaur egun udalean agintzen nor dagoen eta bestetik hauteskunde batzuen azken txanpan gaudela.
Lehenengo desberdintasunari buruz zehaztapen batzuk eman behar dira. Aurreko legealdian (EH Bildu gobernuan zegoela), Lekeitioko udalak, ez behin, birritan idatziz eta baita aurrez aurre eskatu zion BFAri banku batzuk jartzea saihesbidean. Ez ahaztu Osasun zentroak eginiko eskaera izan zela. Eta erantzuna, bistakoa denez, beti ezezkoa izan zen. Bigarrenari buruz hitz batez laburtu daiteke: lotsagabekeria.
Beraz, argi esan dezakegu eskari bat egiterakoan eskaria zentzuzkoa, bidezkoa eta beharrezkoa izatea ez dela nahikoa. Goi mailako erakundeetan agintzen dauden alderdien kolore berberekoa izatea funtsezkoa da. Herritarrak eta beraien beharrizanak bigarren mailako kontuak dira
Pili Robles Barainka. Lekeitioko EH Bilduren izenean.
