Lehen astean atxikipen asko jaso ditu Iparragirre etxeratzeko eskatzen duen kanpaina masiboak

2015/03/10

Herritarrak gutunak sinatzen Ondarroako Alde Zaharrean

Ibon Iparragirre preso politiko ondarrutarrak Madrilgo Alcala Meco espetxean bizi duen egoera salatzeko, gutun bidalketa masiboa hasi du Iparra Galdu Baik plataformak. Presoaren egoerak okerrera egiten duela ikusirik, haren askatasuna eskatzeko bidaliko dira gutunak. Hain zuzen ere, hiru pertsonari zuzenduta joango dira idatziak, eta horrenbestez, bakoitzari zuzendutako gutun eredu bana argitaratu dute gazteleraz. Bata, Angel Yuste Castillejo Espetxeetako idazkari nagusiari (Angel Yusteri igorritako gutuna), bestea, Jose Luis Castro Antonio Espetxe Zaintzako Epaitegi Zentraleko epaile titularrari (Jose Luis Castrori igorritako gutuna) eta azkena, Jaime Alonso Ferreras Alcala Mecoko espetxe zuzendariari (Jaime Alonsori igorritako gutuna) bidaliko zaizkio. Kanpaina aurreko eguenean [martxoak 5] hasi zuten Ondarroako Alde Zaharrean, eta orduz geroztik herritarren ekarpen asko batu dituztela azaldu dute Iparra Galdu Baik plataformako kideek. “300 lagun inguruk parte hartu dute ekimenean, eta 750 bat gutun jaso ditugu lau egunetan”.

Herritarrak gutunak sinatzen

Plataformako kideek aurreratu dutenez gainera, lehen gutunak bidaltzen hasiak dira. “Lehen gutunak gaur [martxoak 10] bidali ditugu. Gure asmoa, denak batera bidali ordez, egunero gutunak bidaltzen jarraitzea da. Horixe da gure erronka. Modu horretara, mezua igorri nahi diegun pertsonek gure berri egunero izango dute, eta zer pentsa emango diegu. Gure laguna eta senidea ez dugula ahaztuta argi utzi nahi diegu hirurei hurrengo asteotan. Bien bitartean, gure eginbidean ez dugu etsiko”. Plataformako kideek nabarmendu dutenez, ahalik eta ekarpen gehiena jasotzea da helburua, Iparragirreren etxeratzea “lehenbailehen” lortzeko. Aurreko asteburuan egin modura, martxoaren 28ra arte asteburuero gutunak sinatzeko mahaiak ipiniko dituzte Alde Zaharrean. Era berean, kanpaina eskualdeko eta inguruko herrietara zabaltzeko asmoa ere badute plataformako kideek.