Ibilaldia 2019 Lekeition izango da
R.M. Azkue ikastolako ordezkariek HITZAri jakinarazi diotenez, astelehenean hartu zen erabakia. Beraz, 2019an Lekeitio izango da ikastolen jai handia hartuko duen herria.
Besteak beste, jaiagaz herrian ikastolaren Hezkuntza Proiektua erreferente nagusi izatea, eraberritzen ari diren Hezkuntza Proiekturako baliabideak lortzea eta eraldaketa pedagogikoa gauzatzeko instalazioak egokitzea ditu helburu Lekeitioko ikastolak.
R.M. Azkuek, baina, ibilaldiari ere ekarpena egingo diola esan dute. “Ikastolaren izaera herritarra kaleratuko dugu, parte hartzailea eta kooperatiboa. Horrez gain, ekoizpen eta kontsumo eredu berriari lotutako jasangarritasuna bultzatuko dugu eta hezkidetzaren bidez parekidetasuna eta berdintasuna landuko ditugu”.
Beste alde batetik, aurten, Durango izango da Ibilaldia hartuko duena, Dagigun! lelopean. Datorren urtean, ostera, Mungian egingo da, eta 2018an Santurtzin.
Eskualdean egin zen azken ibilaldia 2011n izan zen, Ondarroan.
