Erik Mendizabal mutrikuarra denboraldi bikaina egiten ari da
Aurrelari mutrikuarra erraz nagusitu da orain arte Floridako (Ameriketako Estatu Batuak) Dania Jai Alai pilotalekuan jokatu diren norgehiagoetan. Erik Mendizabal puntista mutrikuarra, hain zuzen ere, denboraldi bikaina egiten ari da; 72 kiniela irabazi ditu dagoeneko.
Urtea hastearekin batera hasi zen Denboraldiko Txapelketan (Championship Season) jaun eta jabe da mutrikuarra, bai bakarka eta baita bikoteka ere. Apirilaren erdialdean amaituko da txapelketa, eta horrela jarraituz gero, Hiruko Koroa irabazteko aukera asko dituela jakitera eman dute Jai Alaiko arduradunek. “Pilotari bikaina da, eta are gehiago kinieletarako, bere erregulartasunagatik, iraunkortasunagatik eta hainbat jokotan erakutsi duen nagusitasunagatik. Denboraldiko Txapelketa amaitzeko bi hilabete falta badira ere, beste Hiruko Koroa sari bat irabazteko bidean da mutrikuarra”.
Mendizabalek beste jokalariekiko alde nabarmena lortu du, 72 kiniela irabazita. Sailkapen nagusian bigarren, berriz, Iñaki Urbieta zumaiarra doa, 47 garaipen lortuta. David Iturbide hirugarren da 46 garaipenekin, eta Unai Lekerikabeaskoa Leke eta Iñigo Gorostola Arrieta laugarren eta bosgarren postuetan dira, hurrenez hurren, 42 kiniela irabazita.
Banakako Txapelketan (Singles Championship) ere lehen postuan da Mendizabal, 15 garaipen lortuta. Aimar Aldazabal berriatuarra ere joku ederra ari da erakusten, eta bigarren doa 9 garaipen lortuta. Hirugarren, berriz, Jon Zulaika doa, 8 garaipen lortuta.
Bikotekako Txapelketan ere, mutrikuarra aurrelari onenen artean dago; 16 garaipen lortu ditu bikoteka. Atzetik Zulaika eta Jairo Baroja daude, 6 garaipen lortuta. Atzelarien artean, berriz, lehia berdinduagoa dago. Momentu honetan atzelaririk onena Mikel Amigorena da, 8 kinielarekin. Atzetik dira Alberto Ochoa eta Iñaki Garcia, hurrenez hurren, 7 kinielarekin.
BEHIN-BEHINEKO SAILKAPENAK:
Kiniela gehien (Most Wins)
Erik Mendizabal Daniako frontoian jokatzen. Argazkia: Bo Chambers
- Erik Mendizabal: 72 kiniela
- Iñaki Urbieta: 47 kiniela
- David Iturbide: 46 kiniela
- Unai Lekerikabeaskoa Leke: 42 kiniela
- Iñigo Gorostola Arrieta: 42 kiniela
- Erik Mendizabal: 15 kiniela
- Aimar Aldazabal: 9 kiniela
- Jon Zulaika: 8 kiniela
- Aurrelari onena (Best frontcourt player)
- Erik Mendizabal: 16 kiniela
- Jon Zulaika: 6 kiniela
- Jairo Baroja: 6 kiniela
- Atzelari onena (Best backcourt player)
- Mikel Amigorena: 8 kiniela
- Alberto Ochoa Urtaran: 7 kiniela
- Iñaki Garcia Garita: 7 kiniela
