Asiatikoek irabazi dute Lekeitioko Bajadako sari nagusia

Lea-Artibai eta Mutriku

2017/09/01

Umore ona eta festarako gogoa izan dira nagusi gaur [irailak 1] Lekeition. Plaza bete jendek eman die hasiera jaiei, eta zortzi egunetan etenik barik San Antolin festekin gozatzeko aukera izango dute lekeitiarrek. Urtero bezala, Kuadrillen Bajadagaz hasi dira jaiak. Arratsaldetik ibili dira jai giroan kuadrillak, eta era guztietako mozorroak aukeratu dituzte, lehen egunari kolorea emateko. Lekitto Musika Bandaren atzetik dantzan egin dute plazarako bidea piratak, heroiek, boxeolariek, itsas animaliek… eta bazter guztiak jendez beteta aurkitu dituzte bidean. 20:00ak puntuan atera da Koldo Goitia Lekeitioko alkatea udaletxeko balkoira jaiei hasiera emateko, eta ondoren, aurten 150 urte betetzen dituen herriko bandaren hiru ordezkarik bota dute txupina, bi nagusienek eta gazteenak: Geronimo Zapirainek eta Anton Santamariak, eta Arai Aranzamendik. [Zuzenean ARGAZKI GALERIA ikusi] Kanpandorretik udaletxeko balkoirainoko bidea hartu du jarraian Anterok, eta Antero handi (Eugenio Zabaleta Gabikagogeaskoa) eta Antero txiki (Eneko Gerenabarrena Aboitiz), biak, irten dira balkoira plazan batutakoei goxokiak jaurtitzera. Zazpigarren aldia izan da Zabaletarentzat eta laugarrena Gerenabarrenarentzat. EGITARAUA SAN ANTOLIN JAIAK 2017 Jaiak eztanda egin bezain laster banatu dituzte Kuadrillen Bajadako sariak. Asiatikoek eraman dute sari nagusia, sari bereziak Musika Kioskoarentzat eta Buzkantza kuadrillak osatutako Tribuarentzat izan dira. Kittoren saria, berriz, Euli Beltz kuadrillarentzat izan da, torero eta folklorika kuadrilla ederra osatu dute.

Erlazionatutako edukiaARGAZKI GALERIA: Lekeitioko San Antolin jaiak 2017