Mozorro jaialdiekin eman diete amaiera Lekeitioko aratusteei

Lea-Artibai eta Mutriku

2018/02/13

Azken momentura arte itxaron badute ere, aurten ere bertan behera gelditu da Lekeitioko Eskolako eta Ikastolako neska-mutikoek herrian zehar egiten duten inauterietako kalejira. Euriak ez du atsedenik hartu gaur [otsailak 13] Lekeition, eta beraz, irten ezinik geratu dira mozorrotuak. Hala ere, jairik ez da falta izan. Iturriotz Institutuko gimnasioan egin dute jaialdia Eskolakoek, eta Santi Brouard frontoian bildu dira Azkue Ikastolakoak antzerki berezia eskaintzeko. Bete beteta egon da Iturriotzeko gimnasioa. Ume eta irakasleak aurrean eta guraso eta senideak atzean ikuskizuna ikusteko gogoz. Xabier Iturbe Eskolako zuzendariak egin ditu aurkezle lanak eta txikienetik hasita mailaka, erdira ateratzen joan dira ikasle eta irakasleak azken hileetan prestatutako ikuskizuna eskaintzeko. Abestu, dantzatu eta antzeztu ere egin dute ikasleek. Lekeition garai ezberdinetan bizi izan diren pertsonaiak irudikatu dituzte kromañoietatik hasita. Bale harrapatzaileak, arrantzaleak, jostunak, arrain saltzaileak eta inudeak atera dira dantzara besteak beste.

[zuzenean ARGAZKI GALERIA IKUSI]

Marijo Artola eta Jose de la Torre Purru Azkue ikastolako zuzendariek egin dute bai eta ere aurkezle lana gaur, frontoian. Azaldu dutenez, ikastolak betidanik ospatu ditu inauteriak, eta neska-mutil guztiek batera ospatzen dituztela 23 urte dira. Hasieran plazara joaten ziren, eta 2.000 urtetik aurrera, frontoiko aterpera. Urtero gai bat aukeratzen dute, gidoi bat prestatu eta horren inguruan antolatzen dute ikuskizun musikatua. “Ikastolako komunitate osoak parte hartzen du, 400 lagunek baino gehiagok”, esan dute. Aurtengo gaia Marrazki Bizidunak izan dira, eta Azkue bizi bizia ikusi ahal izan da ikuskizunerako eraldatu duten frontoian. Maya erlea, Azkuetarrak, Asterix eta Obelix galoak eta erromatarrak, indioak, vikingoak Vicky bikingoarekin batera, Potxokiak, Marco, Heidi, Pipi Kaltzaluze, Minions-ak eta beste hainbat pertsonaia ezagun atera dira dantzara.

Erlazionatutako edukiaARGAZKI GALERIA: Inauteriak Lekeition (martitzena)