Azulez eta jendez bete du Ondarroa Zapato Azulak

2018/06/30

Bero-bero etorri da gaur [ekainak 30], Ondarroako Zapato Azule. Eguzkiak gogor jo du eguerdian, baina horregatik inork ez du animorik galdu. Azule bezain jendetsue izan da gainera, Radixu Irratiak antolatutako jaia; eguerdi partean, Kalekutze ingurutik hasita, Erribera kale osoa alde batera eta Nasa eta Kanttope inguruak bestera bete ditu marea urdinak, jairako gogoz. Dantzan, kantuan eta umore onarekin jarraitu dituzte Radixu Irratikoek antolatutako ekimenak eta Nekane Akarregik Alai tabernako balkoitik emandako agindu guztiak. Euskal Herriko Kamiseta Azoka ireki, eta Manuel Eluren ahozko bolanderekin hasi dute jaia Ondarroan. Ordurako, baina, bidean zetozen Dinamartxako partaideak. Batzuk mendiz mendi –74 guztira– eta besteak bizikletan –200 inguru– egin dute Tolosa eta Ondarroa arteko ibilbidea, Dina Bilbao ondarrutarraren omenez. Eguerdian ailegatu dira guztiak Alai parera eta jendez beteriko kalea zeharkatu dute irrintzi, txalo zaparrada, animo eta Txapeldunak kantu artean. Egundoko irrintziak bota dituzte Alaiko balkoitik Natik, Kontsuelok, Idurrek eta Agurtzanek.

[zuzenean ARGAZKI GALERIA IKUSI]

Txistulariek lehenengo, eta Kresalako bandak eta Artelango erraldoiek ondoren, animatu dute giroa, eta Dinamartxa bien ailegaeragaz oraindik gorago egin du jaiak. Ondo pasatu arren, falta direnak gogoan hartuta, elkarretaratzea ere egin da Kalekutzean, eta aurten berriro herrian daudenei ongietorria eman diete. Omendua. Urtero, Zapato Azulean, omenaldi bat egiten dio bateren bati Radixu irrati libreak. “Aurten, Iñigo Zabala Arrizabalaga Zapato Azuleko sortzaileetako bat, urteroko Zapato Azuleko kartelen egile, asmatzaile, sortzaile eta bromazale famau” izan dela aukeratua esan du ozen mikrofonotik Nekane Akarregik, pregoia irakurri ondoren. Ezustekoa eraman du Zabalak. Dinamartxako bizikleta ibilbidetik heldu berri, Alaiko balkoira igo da, semeekin batera, jendearen txalo zaparrada jasotzera.

Iñigo Zabala Arrizabalaga, gaurko omendua erdian eta 21. Euskal Herriko Kamiseta Azokako irabazleak: Sara-Itsasuko Ez Kexa eta Ondarruko Danak Etxea! taldeetako kideak.

Zabalak eman ditu Euskal Herriko 21. Kamiseta Azokako sariak: diploma, Markinako harrizko bola eta estrapua. Euskal Herri osotik etorritako 21 erakusmahai egon dira errekaren beste aldean, Latxanbre enparantzan: 14 Euskal Herri mailakoak eta 7 Ondarrukoak. Euskal Herriko saria Sara-Itsasuko Ez Kexa-k eraman du, eta Ondarruko saria Danak Etxea!-k. Horrez gain, erakusleiho onenari ere saria eman diote; irabazlea Klik-Klak-eko Yolanda Eizagirre izan da.

[zuzenean ARGAZKI GALERIA IKUSI]

Kamiseta erosleek ere eduki dute oparia. Guztien artean zozketa egin dute. Horrela, Kantabrikok emandako janariz betetako otzara eraman du Juan Artetxek eta Boga Garagardo sorta Mari Egigurenentzat izan da. Beroaren beroagaz, ekaitza egon da arratsaldean, eta umeen jolasak amaitu barik geratu dira. Hala ere, umeak “pozik” goxokiak bota dizkiete eta balkoitik. Kalekurutzean jo behar zuen Ttek elektrotxarangak ere Plaza Musikan jo behar izan du, eta Alai aurretik bertara bidali dute jendea dantzara. Andrabanda feministak eman ditu azken danbadak. 105.5 FM-n edo Radixu.info-n jarraitu daiteken Ondarroako irrati libreak bere eguneroko funtzionamendua finantzatzeko antolatzen duen jaiak aldaketa bat edo beste izan ditu aurtengo egitarauan; aldatu ez dena Zapato Azulak daukan arrakasta izan da.

Erlazionatutako edukiaARGAZKI GALERIA: Ondarroako 21. Zapato Azule