Gasoil isuria egon da Ondarroako portuan
Domeka [irailak 30] arratsaldean Ondarroako portuko uretan gasoil isuria egon zela ohartarazi zuten herritarrek. Izan ere, gasoil usaina nabaria zen inguruetan. Gasoil orban handia ikusita, herritar batek Larrialdietara deitu zuen, eta larrialdi zerbitzuetatik Ondarroako udaltzainak bertaratu ziren portura zer gertatu zen ikuskatzera. Udaltzainek gertatutakoari buruzko akta jaso zuten.
Eguzki talde ekologistak nabarmendu duenez, ez da isuria gertatzen den lehen aldia. “Horrelako ekintzak inor zigortu gabe egiten dira. Azkenaldian, gainera, bestelako beste hainbat isuri egon dira errekan eta baita araztegitik, eta nazkatuta gaude. Egoera onartezina dela deritzogu”.
Gaineratu dutenez, gaiari erantzun bat emateko erantzukizuna duten erakundeek ez dute horren inguruan askorik egiten. “Orain hogei urte moduan gaude, berdin berdin”. Orbanari dagokionez, gaur [urriak 1] ere ikusgarri zegoen.
Gasoil orbana Ondarroako portuko uretan, gaur goizean
