Txirrindulariz bete da Arretxinaga San Migel jaietako bigarren egunean

2018/10/01

Markina-Xemeingo BTT martxa ospatu zen atzo [irailak 30] San Migel jaietako bigarren egunean, eta 186 txirrindulari txikik eta nagusik parte hartu zuten Markina-Xemein inguruetan egin ziren hiru martxetan. 09:00etan abiatu ziren 40 kilometroko ibilbide luze eta 26 kilometroko ibilbide ertainetan parte hartu zuten 120 txirrindulariak. Ibilbidea siku zegoela eta, gustura ibili ziren Santa Eufemi eta Akarregi inguruetako bideetan zehar.

Markina-Xemeingo BTT martxako ibilbide motzeko parte hartzaileak. Argazkia: Jabi Gorbea

Barroeta kirolguneko zirkuitu berria estreinatu zuten, berriz, 11:00etatik aurrera pedalkadak eman eta eman aritu ziren 66 ume, gazte eta nagusiek. Lehen aldapan behera trabatuta gelditu ziren batzuk eta pilaketak ere egon ziren, hala ere, zirkuituari bueltaka ibili ziren denak eta txikienak Arretxinagara itzuli ondoren, ostera luzeagoa egin zuten nagusiagoek.

[ikusi ZUZENEAN ARGAZKI GALERIA]

Tortillak. Arantza eta Pantxo taldeak eguerdia girotzen zuen bitartean X. Tortilla Txapelketako irabazlea erabaki zuen epaimahaiak. 37 tortilla aurkeztu ziren lehiara eta lehen aukeraketa bat eginda 17 heldu ziren finalera. Guztien gustua, egosi puntua eta itxura kontuan hartuta puntuak eman zituzten epaimahaiko kideek eta jai batzordekoekin batera zenbatu zituzten. Bego Fernandezen tortilla izan zen irabazlea, herriko jatetxe batean bi lagunentzako jatordu bat eta txapela eraman zituen.

Bego Fernandez Tortilla Txapelketako irabazlea Arretxinagako jai batzordeko kideekin.

Tortillarik ez da falta izan Arretxinagan. Aurtengo azpiegitura aldaketak eraginda, tortillak Arretxinagan bertan egitea ezinezkoa zitzaion jai batzordeari, hori dela eta, laguntza eskatu eta tortillak eramateko eskaria egin zuten. Herritarrek erakutsitako eskuzabaltasuna eskertu dute jai batzordekoek. Izan ere, 58 tortilla jaso zituzten zapatuan eta beste 37 domekan.

[ikusi ZUZENEAN ARGAZKI GALERIA]

Umeek gozatzeko moduko eguna izan zen atzokoa. Hortzmuga taldeak June kale antzerkia eskaini zuen arratsaldean, eta ikusleak ere Benito, June eta haren ilobaren abenturen partaide izan ziren. Amaitutakoan, Sustraiak Naturak antolatutako eskulan eta jolasekin olgetan ibili ziren ume eta gazteak eta amaitzeko buruhandien aurrean ibili ziren aringa-aringa. Jaiei amaiera bikaina emateko Txalo Konpainiaren Ergela antzezlana ikusteko aukera egon zen probalekuko karpan gauean, Sara Cozar eta Joseba Apaolaza aktore ezagunekin, eta su eta argi ikuskizunak argitu zuen gaua gero. HONEKIN LOTUTA: Markina-Xemeingo San Migel jaiak usadio zaharren plaza