Ondarroako Udalak aniztasun funtzionala dutenen aldeko bandera ipiniko du astelehenean
Aniztasun Funtzionala Dutenen Aldeko Naziorteko Eguna da astelehena [abenduak 3]. Horren harira, Ondarroako Udalak Down Sindromea daukan Eros Recio dantzari profesional valentziarrak urritasun fisikoa dutenen alde egindako bandera ipiniko du udaletxean. Udalak herritar batzuen eskaerari erantzunez ipiniko du bandera. Eta azaldu dutenez, dakitenez, Ondarroakoa bandera hori ipintzen duen Euskal Herriko lehenengo udala izango da. “Ondarroako Udalari bandera erosteko eskera egin zitzaion, eta udalak erosi egin du”.
Aniztasun funtzionala dutenen kolektiboa Espainia mailan banderarik ez zeukan kolektibo bakarra zen. Horren jakitun, Reciok bandera diseinatu eta Jabetza Intelektualaren Erregistro Orokorraren aurkeztu zuen. Bandera urrearen, zilarraren eta brontzearen koloreko hiru marra horizontalek osatzen dute. Urritasun Fisikoa Dutenen Aldeko Nazioarteko Egunaren harira, bandera Nazio Batuen Erakundean aurkeztu zuten, eta NBEko kideek onartu egin zuten.
Eskaera egin duten herritarrek Ondarroako Udalari eskerrak eman nahi izan dizkiete. Horrez gain, herritarrei kolektiboaren aldarrikapenak zeintzuk diren interesatzeko gonbitea egin diete. Eta gainerako udalei ere euren udaletxeetan bandera ipintzeko eskaera luzatu diete.
Recio, eskuinean, banderagaz.
