Hondartza berriro bere gain hartu eta konpontzeko eskaria egin diote Kostas-i
Mutrikuko Berdeak-Independienteak taldeak eta Mutriku Natur Taldeak egin dute eskari formala. Eusko Jaurlaritzaren esku utzitako 246.932 metro koadroak berriro ere Itsas Ertzeko Eremu Publikora bueltatu eta bere gain hartzea eskatu diote Mutriku Natur Taldeak (MNT) eta Berdeak-Independienteak plataformak (B+I) Kostetako Zuzendaritzari. Gutun formala igorri berri diote, horretarako, Madrilgo zuzendaritza orokorrera. Kostas-en baldintzak ez dira bete Portu berriaren proiektua tarteko egin zuen metro koadro horien lagapena Kostas-ek. Lau baldintza ipini zizkion Eusko Jaurlaritzaren Portuen Zuzendaritzari: olatuen indarrarekin energia sortzeko gunearen Ingurune Eraginaren Azterketa egitea, Mutrikuko hondartza berreskuratzea, dikea egiteko materialak harrobi legalizatuetatik ekartzea, eta obrako epeak betetzea. «Bost urte igaro dira eta baldintza horietako bat bera ere ez du bete Eusko Jaurlaritzak. Lehen guztiona zen eremu hori oso modu okerrean kudeatu dute, bai teknikoki eta bai administrazio aldetik», esan du Berdeak-Independienteak taldeko zinegotzi Iñigo Agirrek. «Ondorioak begien aurrean dauzkagu: 25 milioi euro diru publikotik gastatuta, bukatu gabeko obra bat, eta lehen hondartza zena esperpento bihurtua», gehitu du. Eusko Jaurlaritzak bere lege eta araudi propioak ez dituela bete salatu dute MNT-k eta B+I-k. «Energia sortzeko gunearen Ingurumen Eraginaren Azterketa ez da egin; egoera irregularrean dauden harrobietako materiala erabili dute dikerako; ur-ertza atzeratzea eragin du dikea eraikitzeko moduak, Burumendiko hondartza desagertaraziz eta ondoko [...]
Mutrikuko Berdeak-Independienteak taldeak eta Mutriku Natur Taldeak egin dute eskari formala. Eusko Jaurlaritzaren esku utzitako 246.932 metro koadroak berriro ere Itsas Ertzeko Eremu Publikora bueltatu eta bere gain hartzea eskatu diote Mutriku Natur Taldeak (MNT) eta Berdeak-Independienteak plataformak (B+I) Kostetako Zuzendaritzari. Gutun formala igorri berri diote, horretarako, Madrilgo zuzendaritza orokorrera.
Kostas-en baldintzak ez dira bete
Portu berriaren proiektua tarteko egin zuen metro koadro horien lagapena Kostas-ek. Lau baldintza ipini zizkion Eusko Jaurlaritzaren Portuen Zuzendaritzari: olatuen indarrarekin energia sortzeko gunearen Ingurune Eraginaren Azterketa egitea, Mutrikuko hondartza berreskuratzea, dikea egiteko materialak harrobi legalizatuetatik ekartzea, eta obrako epeak betetzea.
«Bost urte igaro dira eta baldintza horietako bat bera ere ez du bete Eusko Jaurlaritzak. Lehen guztiona zen eremu hori oso modu okerrean kudeatu dute, bai teknikoki eta bai administrazio aldetik», esan du Berdeak-Independienteak taldeko zinegotzi Iñigo Agirrek. «Ondorioak begien aurrean dauzkagu: 25 milioi euro diru publikotik gastatuta, bukatu gabeko obra bat, eta lehen hondartza zena esperpento bihurtua», gehitu du.
Eusko Jaurlaritzak bere lege eta araudi propioak ez dituela bete salatu dute MNT-k eta B+I-k. «Energia sortzeko gunearen Ingurumen Eraginaren Azterketa ez da egin; egoera irregularrean dauden harrobietako materiala erabili dute dikerako; ur-ertza atzeratzea eragin du dikea eraikitzeko moduak, Burumendiko hondartza desagertaraziz eta ondoko maldak arriskuan ipiniz; eta azkenik, Kostetako Zuzendaritzak ipini zituen epeak ere ez dira bete, 2009ko apiriletik daude jada epea igarota, bai energia gunea eraikitzeko lanekin, bai hondartza berreskuratzearekin ere».
Sei uda hondartza gabe
Hondartza berreskuratzeko lanak hasi ere ez dira egin, eta hori ere salatu dute bi taldeek Kostetako Zuzendaritzari igorritako eskarian: «Sei uda daramatzagu hondartzarik gabe, eta jende pilaketa eta baldintza eskasetan; hurrengo uda horrela ez izatea nahi dugu».
Hori guztia kontuan hartuta, Kostetako Zuzendaritzari eskatu diote bere gain hartzea herriko hondartza eta Burumendikoa berreskuratzearen ardura, lan horren kostua Eusko Jaurlaritzaren Portuen Zuzendaritzari kobratuz.
