Euskal Jaia badator
Zapatu honetarako gonbitea zabaldu du Boga! Ibilaldi Kulturalak eta bazkari txartelak eskura daude jada. Euskal dantzak eta musika tresna herrikoiak izango dira ardatz Euskal Jaian. Prestaketak eginak daude; orain herritarrak animatzea eta parte hartze...
Zapatu honetarako gonbitea zabaldu du Boga! Ibilaldi Kulturalak eta bazkari txartelak eskura daude jada.
Euskal dantzak eta musika tresna herrikoiak izango dira ardatz Euskal Jaian. Prestaketak eginak daude; orain herritarrak animatzea eta parte hartzea falta da.
Zubi Zahar herri ikastolatik dei berezia egin dute zapatuan ikastolan bertan egingo den bazkarirako txartelak «lehenbailehen» eskuratzeko. «Komeni da aldez aurretik jakitea zenbat jende batuko den bazkaritan, eta horregatik, txartelak gehiago itxaron barik eskuratzeko esan nahi diegu herritarrei», esan dute. Txartelok, ikastolan bertan, Ibilaldiaren dendan edo Xirula tabernan ipini dituzte saltzen.
Baina Euskal Jaia bazkaria baino lehen hasiko da. 12:00etan batuko dira musikariak eta parte hartu nahi duten herritarrak Alde Zaharrean. Handik Itsasaurreraino joango dira kalejiran, eta bertan egongo da eguerdiko jai gunea. Ez da txosna faltako, sagardoagaz eta pintxoekin.
Ondoren, esandako moduan, herri bazkaria egingo dute Zubi Zahar ikastolan, eta bazkalostean jarraituko du euskal jai giroak, bertako jolastokian egingo den erromeriagaz.
Txistulariak, soinu joleak eta pandero joleak deitu dituzte Boga! Ibilaldiko antolatzaileek, eta han egongo dira, egunari doinua emoten. Hainbat herritar be, aldez aurretik girotu dira, euskal dantzen ikastarotxoa eginda. «Baina ikastaroa egin ala ez, herritar 
alaia egin nahi diegu», esan dute. «Baserritar edo arrantzale jantzita bada, hobe; eta bestela be, umorez jantzita».
