Euripean baina giro onean ospatu dute VI. Umeen Euskal Jaia
Euria egiten zuela eta, plazan eta ikastolan egin zuten dantzan, Lekeitioko Etorkizuna dantza taldeak antolatutako VI. Umeen Euskal Jaian parte hartu zuten dantzariek. Ikuskizun dotorea eskaini zuten. Atertu zuenean atera ziren Ateatik Lekeitioko Etork...
Euria egiten zuela eta, plazan eta ikastolan egin zuten dantzan, Lekeitioko Etorkizuna dantza taldeak antolatutako VI. Umeen Euskal Jaian parte hartu zuten dantzariek. Ikuskizun dotorea eskaini zuten.
Atertu zuenean atera ziren Ateatik Lekeitioko Etorkizuna, Markina-Xemeingo Zerutxu, Ondarroako Kresala, Sondikako Gorantzaileak eta Bilboko San Inazio auzoko Goierri dantza taldeak kalejiran. Lehenengo geldialdia Talan egin behar zuten , baina, euriaren mehatxupean, ez ziren gelditu plazara arte. Plazan dantza batzuk eta elizpean beste batzuk egin eta goizeko ikuskizuna amaitutzat emon zuten.
Kanpoko umeak banatu eta bazkalostean batu ziren dantzariak ikastolako frontoian. Halan, aterpean, saio osoa eskaintzeko aukera izan zuten taldeek. Amaieran, aldiz, dantzariez gainera, gurasoak eta ikusleak be dantzara atera ziren eta guztiak batera Zazpi jauziak eta Larrain dantza dantzatu zituzten, giro onean.
Ekitaldia, azkenean, arrakastatsua izan zen, baina gurasoek zein antolatzaileak minduta agertu ziren Udalak izandako jarreragaz. Dantza taldeak frontoia eskatu zuen, euria balego bertara joateko, eta ezezkoa eman zieten, “segurtasun neurriak argudiatuta”. “Frontoian ezin bada beste aukera batzuk eskaini beharko lituzke Udalak. Horrelako ekitaldi bat ezin da-eta bertan behera utzi eguraldiaren arabera”, esan dute Etorkizuna dantza taldekoek.
