Xiri Andonegi omenduko du Mutrikuk
Urtarrilaren 19ak kolpe gogorra eman zien mutrikuarrei. Xiri Andonegi Egurbide (1955-2011) zendu zen, ezustean. Kolpe latza Mutrikuko herriarentzat. «Hutsune handia» utzi zuen. Orain, ia hiru hilabete pasatuta, berak Mutrikuri eman ziona aitortu nahi diote omenaldian. Domekan izango da ekimena. Ikusiko denaren atzean herriko talde ugari ibili dira azken hilabeteetan lanean: Zine Forum taldea, Gure Ametsa dantza taldea, erraldoi taldea, konpartsa, Goizeko Izarra antzerki taldea, Akelarre antzerki taldea, Txantxangorri aisialdi taldea, herriko musika banda, banda txikia, trikiti taldea, txistu taldea, Madalen abesbatza, Arte Tailerra, Bertso Eskola, Mutriku Rock Kolektiboa, Kalaputxi… Herriko kulturgintzan parte hartzen duten talde gehienak hortxe. Banakoek ere ipini dute euren apurra, «Xiri Andonegi zelako zen bezalakoa, eta eman zuelako zeukan guztia». Xiri Gunea, ondarea Herrigunean kalejira, eta Atxukale barruan eskultorearen gaineko ikus-entzunezkoa emango dute. Ondoren, Atxukaleko parkean egingo da ekimen nagusia, Andonegik mutrikuarrei oparitu zien elkarleku berezian. Hantxe, parkeari izena emango dion plaka bistaratuko du familiak: Xiri Gunea. Koadrilakoek, «Xiriren hasierako gogoari helduta», hagin bat landatuko dute, iraunkortasunaren isla. Alaia, xumea, euskalduna eta lagunartekoa izango da ekimena, «Xiri zen bezalakoa». EGITARAUA, APIRILAK 10 KALEJIRA 11:00etan, Gaztetxe aurrean elkartuko dira herritarrak. -Ibilbidea. Gaztetxe aurretik, San Agustin kaletik, Barrenkalera, Atxitxin aldapan gora, Konde kaletik, Goiko Plazara. Han dantzak egingo dira, [...]
Urtarrilaren 19ak kolpe gogorra eman zien mutrikuarrei. Xiri Andonegi Egurbide (1955-2011) zendu zen, ezustean. Kolpe latza Mutrikuko herriarentzat. «Hutsune handia» utzi zuen.
Orain, ia hiru hilabete pasatuta, berak Mutrikuri eman ziona aitortu nahi diote omenaldian. Domekan izango da ekimena. Ikusiko denaren atzean herriko talde ugari ibili dira azken hilabeteetan lanean: Zine Forum taldea, Gure Ametsa dantza taldea, erraldoi taldea, konpartsa, Goizeko Izarra antzerki taldea, Akelarre antzerki taldea, Txantxangorri aisialdi taldea, herriko musika banda, banda txikia, trikiti taldea, txistu taldea, Madalen abesbatza, Arte Tailerra, Bertso Eskola, Mutriku Rock Kolektiboa, Kalaputxi… Herriko kulturgintzan parte hartzen duten talde gehienak hortxe. Banakoek ere ipini dute euren apurra, «Xiri Andonegi zelako zen bezalakoa, eta eman zuelako zeukan guztia».
Xiri Gunea, ondarea
Herrigunean kalejira, eta Atxukale barruan eskultorearen gaineko ikus-entzunezkoa emango dute. Ondoren, Atxukaleko parkean egingo da ekimen nagusia, Andonegik mutrikuarrei oparitu zien elkarleku berezian. Hantxe, parkeari izena emango dion plaka bistaratuko du familiak: Xiri Gunea. Koadrilakoek, «Xiriren hasierako gogoari helduta», hagin bat landatuko dute, iraunkortasunaren isla.
Alaia, xumea, euskalduna eta lagunartekoa izango da ekimena, «Xiri zen bezalakoa».
EGITARAUA, APIRILAK 10
KALEJIRA
11:00etan, Gaztetxe aurrean elkartuko dira herritarrak.
-Ibilbidea. Gaztetxe aurretik, San Agustin kaletik, Barrenkalera, Atxitxin aldapan gora, Konde kaletik, Goiko Plazara. Han dantzak egingo dira, erraldoi eta dantzariekin. Handik Erdiko kalean behera, Beheko Plazara. Dantzak.
-Lanak. Herriko taldeek Xiri Andonegiren lanak eramango dituzte kalejiran: Txerria, Loritoa, Sin Chan eta guardia zibilen txapelak, Zezena, buruhandiak, erraldoiak eta Olentzero. Gaztetxekoek hankapaloak aterako dituzte.
-Musika taldeak. Herriko musika banda, banda txikia eta trikitilariek hartuko dute parte.
XIRI GUNEKO EKITALDIA
Beheko plazan dantzak amaitzean, Xiri Gunera joateko deia egingo du txalapartak.
-Txalaparta deia. Josu Andonegik eta Joseba Beristainek.
-Bertsoak. Bertso Eskola.
-Antzerki laburra. Ay Lupita! Goizeko Izarra antzerki taldearen eskutik.
-Herriko kultur taldeen idatziaren irakurketa.
-Plaka bistaratzea. Familiak.
-Agurra. Gure Ametsa Dantza taldeko arduradunen eskutik.
-Madalen abesbatzaren saioa.
-Hagina landatu. Xiri Andonegiren lagunek egingo dute.
-Sigmako lankideen agurra.
-Internazionala abestu
