Zapatura arte dago izena emoteko aukera XVIII. Kintxopeko zaldi-mando probetan
Beste behin, kintxopeko zaldi-mando probak hartuko ditu Ispasterrek. Hain zuzen be, lau egunetan lehiatuko dira probotan: otsailaren 15ean, 16an, 17an eta 18an. Dena den, aurretiaz emon beharko dute izena bertan parte hartu nahi dutenek.
Ispasterko Udalak antolatuta, aipatu egunetan 18:00etan eta 21:00etan emongo diete hasiera XVIII. Kintxopeko zaldi-mando probei. Udalak jakinarazi duenez, Ispasterko harria erabilita lehiatu beharko dira parte hartzaileak. Abereen oinarrizko pisua, bestetik, 400 kilokoa izan beharko dela azaldu dute. Hala, saioa hasi baino ordubete lehenago pisatu beharko dituzte.
Beti ohi bezala, aurtengo probetan be sariak banatuko dituzte Ispasterren; hain zuzen be, hamar sari banatuko dituzte. Lehenengo hamar onenen artean, guztira, 5.100 euro banatuko dituzte. Probetan gailentzen denak, gainera, diruaz gain manta eta txapela be eskuratuko ditu. Aipatu hamar sariez aparte, gainera, beste sari posible bat be egongo da; izan be, saririk jaso barik geratzen den parte hartzaile batek irabazlearen markaren %70a egiten badu, 300 euroko jasoko ditu.
Probetan izena emon gura duenak zapatua, otsailaren 2a, izango du horretarako azken eguna; alegia, egun horretan 13:00ak baino lehen Ispasterko udaletxera jo beharko du interesatuak, edo, bestela, telefonoz deituta (94 684 29 99 zenbakira) egin ahalko du. Izena emoteko animaliaren Identifikazio Zenbakia ezinbestekoa izango dela aurreratu du udalak.
