Bare-Baren izango da bihar, Mutrikuko Mendi Topaketen lehen emanaldia

2013/02/20

Adolfo Madinabeitia eskalatzaile gasteiztarra

Guztia prest dago Mendiz Mendi Emanaldien Zikloa bidea egiten hasteko. Sorginerreka eskalada taldeak eta Burumendi mendi taldeak elkarlanean, Mutrikuko Mendiko I. Topaketak antolatu dituzte. Aurten, mendizaletasuna herritarrei gerturatu nahian, herriko tabernetara atera dute ekimena. Lehenengo hiru emanaldietan mutrikuarrek hartuko dute hitza: Garikoitz Basterretxeak, Txirritak, Goxerrik eta Jokin Larrañagak. Laugarren eta azkenean, Adolfo Medinabeitia gasteiztarrak emango du bere esperientziaren berri. Emanaldi guztiak eguen arratsaldetan izango dira. Guztiak euskaraz izango dira. TOPAKETEN EGITARAUA Bihar, otsailak 21 Bare-Baren, 19:30ean. Mendi bizikletaz mongoliatik zeharkaldia. Garikoitz Basterretxea mutrikuarrak Mongoliako lautadetan bizi izan zituen esperientziak, bertakoekin elkarbizitza eta horrelako bidaietarako bizikleta nola prestatu kontatuko du irudiez lagunduta. Otsailak 28 Zubiaramen, 19:30ean. Hutsaren gainean dantzan. Txirritaren eskutik irudi ikusgarriak ikusiko dira lack-line-ari buruz, Euskal Herrian eta munduan. Slack-line-aren historia apur bat ere kontatuko du hizlariak. Martxoak 7 Subeltz tabernan, 19:30ean. Lotus flower bidea. Kanadako zirko eskalaezinaren gainean hitz egingo dute Igor Mendizabal Goxerri eta Jokin Larrañaga mutrikuarrek. Iazko udan egin zuten eskalada bidaiaren berri emango dute. Irudietan Kanadako paisaia ikusgarriak ikusi ahalko dituzte parte hartzaileek, bai eta bertako animali basatiak ere. Eskalada-bidaia Azpeitiko Udalak antolatzen duen Takolo Bekaren 2012ko sariduna izan da. Martxoak 14 Goitibeheran, 19:30ean. Un mundo perdido. Adolfo Madinabeitia gasteiztarrak Venezuelako oihaneko filma aurkeztuko du, bertako 1000m hormak dituzten tepuy izeneko mendietan egin dituen eskaladak erakutsiz.