Egitasmoaren aurkezpena, Emarock erakusketa, dokumentala eta musika emanaldia batuko ditu Etxelilaren irekiera ekitaldiak etzi, 18:00etan hasita.
Emakumeen topalekua Ondarroan emakume elkarteen aspaldiko aldarrikapena izan da, eta «espazio dinamiko eta irekian, herriko emakumeentzako enpatia sortzeko topagunea, ikasteko eta informazioa jasotzeko tokia, jabekuntza sareak sortzeko espazioa eta emakumeen berdintasuna, askatasun, partaidetza eta presentzia sustatzeko espazioa» eskainiko du.
Ondarroako Udalak jakitera emon duenez, emakumeen eta gizonezkoen arteko berdintasuna lortzearen aldeko jarduerak antolatu nahi duen edozein talde, elkarte edo banakok ahalko dute erabili emakumeen topalekuko gunea, beti be ezarritako jarduera-ildoekin bat egiten badute. Etxelila, besteak beste, gune irekia, aldarrikatzailea, feminista, askea eta laikoa da.
Bidea egiten hasita
Martxoaren 8ari lotuta Etxelila asteon inauguratuko bada be, bertan ari dira egiten 2012-2013 ikasturteko Jabekuntza Eskoletako tailer eta ikastaro asko. Era horretan, herriko emakumeen topalekua ez eze, eskualdekoena be izaten da, gero eta gehiago dira- eta ikastaroetan izen emoten duten eskualdeko partaideak.
