Mutrikuko Kofradiak desagertzeko arrisku larrian dagoela jakinarazi du
Kofradiarekin batera, herriko arrantza desagertuko da, portua azken aldian izandako zenbait gertaera tarteko. “Jakina den bezala, portuan obrak hasiak dituzte pantalanak jartzeko. Horren harira, esan beharra dago, Portuen Zuzendaritza eta Eusko Jaurlaritza eta are zuzenago Gipuzkoako Lurralde Zerbitzua herriko arrantza aktibitateari trabak eta oztopoak jartzen ari dela. Interesatzen zaien gauza bakarra kirol portuaren garapena da. Egoera honek jarrera autoritario eta agintzailea dakar berarekin, non beste guztiok ez daukagun ez hitzik eta ez bozkarik”, adierazi du Mutrikuko Kofradiak.Kofradiakoek esan dutenez, kontaezinak izan dira euren jarduna berriro martxan jartzeko ipini dizkieten eragozpenak. “2012an gure lonja egokitzea lortu genuen, horretarako beharrezkoak ziren gailuak eskuratuta, eta arrainaren trazabilitatea bermatzen zuen sistema informatikoa jarrita. Gabonetan, osorik desmuntatu ziguten, gauez eta aurrez abisatu ere egin gabe. Gure bulegoko liburuetara eta ordenagailuetara heltzeko modurik gabe gelditu ginen”, salatu dute.
Hala eta guztiz ere, fede onez, hainbat alternatiba proposatu zizkien kofradiak bulego berriaren eta izotz makinaren balizko kokapenekin. “Gure ahalegin guztiak hutsean gelditu ziren. Ez ziguten erantzun ere egin”.
Hala eta guztiz ere, fede onez, hainbat alternatiba proposatu zizkien kofradiak bulego berriaren eta izotz makinaren balizko kokapenekin. “Gure ahalegin guztiak hutsean gelditu ziren. Ez ziguten erantzun ere egin”.
Haien azkenengo erabakiak, berriz, zentzugabekeria bere maila gorenera eraman duela diote: “Moila osoa hesitu dute eta porturatzeko babesak kendu. Ondorioz, ontzien sarrera zaildu egin dute, baita zamalanak egitea ere. Hau guztia guri abisurik eman gabe eta gurekin hitzik egin gabe egin dute, noski. Badakigu portuaren ‘jabeak’ direla, baina gutxienez, gauzak estiloarekin egin beharko lituzketela uste dugu. Gaur goizean bertan, arrantzaleek kandatuak edo giltzarrapoak apurtu behar izan dituzte euren ontzietara sartu ahal izateko. Gaizkileak bailiran ibili beharra, lotsagarria da benetan”.
Gogoratu dute Kofradia denbora luzez ari dela lanean Mutrikun porturatzen diren ontzien kopuruak gora egiteko. Gaur egun, artisau arrantza egiten duten hiru ontzi daude Mutrikun. Gainera, beste zenbait zonaldetako ontziak erakartzen saiatzen dira berdelaren edo antxoaren kanpainarako. “Horrekin lortu nahi duguna zera da: bizirauteko bitarteko ekonomikoak lortzea. Eta gutxinaka lortzen ari ginen. Horren adibide garbia da azkenengo berdelaren kanpaina txikia. Mutrikun zortzi ontzi porturatu dira, eta antxoa garairako ere haiek hemen edukitzea aurreikusita geneukan. Baina, ze ontzi etorriko da Mutrikura lanera aurrez aipatutako egoerarekin eta horrek dakartzan baldintzekin? Eta ze kamioi jaitsiko da moilara iragaezina den aldapa topatuko badu, eta moilan maniobra egiteko tokirik ere ez badauka?”.
Aurreikusitako diru sarrera horiek gabe, Mutrikuko Kofradia oso-oso egoera larrian dagoela diote.
