Ekainaren 17tik abendura bitartean Mutrikun herri barruko autobus zerbitzua izango da. Autobusak egingo duen ibilbidea Txanbolingo biribilgunean hasiko da 8:00etan eta anbulategiko geltokitik bi aldiz pasatuko da.
Arrate Uranga alkateordeak autobusaren nondik norakoak azaltzeko egindako batzarrean aurkeztutako proiektua behin behinekoa dela azpimarratu du. «Erabilerak erakutsiko digu zer nolako beharrak dauden».
Herri busa herriko puntu ezberdinen arteko konexioak ezartzeko baliagarria izan behar dela adierazi du Urangak. «Anbulategiaren geltokiari garrantzi berezia eman diogu jende nagusia eta ezinduak irisgarritasun arazorik izan ez dezaten». Hala eta guztiz be, mikrobusa herritar guztientzako zerbitzua dela esan du Urangak. Horrez gainera, mikrobusarekin udan moilara jeisteko zerbitzua be eskaini gura du.
Mikrobusak egingo duen ibilbideak 40 minutuko iraupena izango du. Astelehenetik ostiralera, orduro egongo da autobusa, 8:00etatik 13:00etara bitartean. Libre gelditzen diren 20 minutuetan, autobusa Mijoa auzora bideratzea pentsatu du udalak, baina geltoki hori behin behinekoa izango da.
Bidai txartelak 0,50 euroko kostua izango du bidai bakarra egingo duenarentzat. Beherapenak izango dituzte 5 euroko txartelarekin, izan be 12 bidaia egiteko aukera izango dute eta 10 euro ordaintzen duenak berriz, 25 bidai egiteko aukera izango du.
Autobus zerbitzuak 27.000 euroko kostua izango du. Diru kopuru garrantzitsua dela iruditzen zaio udalari horregatik zerbitzua martxan jarri ahala, beti be hobetzera begira, aldaketak egingo dituztela aurreratu dute. Momentuz abendura arte zerbitzua egongo dela baieztatu du Mutrikuko Udalak.
Geltokien zerrenda:
1. Txanbolingo biribilgunea
2. Portuko zabalera
3. San Agustin
4. Iriagirre
5. Goiko Plaza
6. Anbulategia
7. Samikoila
8. Gabilondo ur biltegia
9. Eladio parea
10. Anbulategia
