Jai giroa nagusi Ondarroako 16. Zapato Azulean
http://www.youtube.com/watch?v=BraYbvELHHw Herria azul jantzita esnatu da eta kalean jai usaina da nagusi. Dinamartxa, pregoia, kamiseta azoka, Alde Zaharra beteta. Ondarroako Zapato Azulak beste behin be ez du huts egin. Radixu Irratia (105.5 FM) be zuzeneko konexioak egiten ari da. Aurtengo omendua: Poleneko mantekau (Helados Ruiz). Kamiseta azokako irabazleak: Apar & Bits (ondarrutarren artean onena) eta Kikuko (Euskal Herrikoen artean onena - Eibar)
Eguneko kronika
Panba, panba…». Ekainak 29, zapatua, 12:00ak. Manuel Eluk ahozko bolanderak bota ditu, bata bestearen atzetik, gogotsu. Zapato Azula martxan dago. Lehenengo minutuetan ez da omenaldirik falta izan: Manuel Eluri berari eta Nekane Akarregiri argazki eder bana oparitu die Radixu Irratiak, esker oneko, «merezi dutelako».
Minutuek aurrera egin ahala, alde zaharra jendez betetzen hasi da. 13:00ak ailegatu orduko ez da erraza Zubi Zaharretik Zubi Barrirainorako bidea egitea. Balkoian, esataria etenik barik ari da jaiaren xehetasun guztiak mikrofononoz esaten.
14:15. Dinamartxak ailegatu dira. Ez da inor kabitzen alde zaharrean. Tolosatik etorri direnek ongietorri beroa jaso dute, eskertzen den horietakoa hainbeste kilometroko bidea egin eta gero.
Munduko izozkirik onena
Omendua zein den jakiteko momentua ailegatu da. Ez da pertsona bat, ez da talde edo elkarte bat… Aurtengo omendua Poleneku mantekau da. Alaiko balkoiaren bueltan daudenak barrez lehertu behar dira. «Hamen, Ondarroan bakarrik egin daiteke omenaldi bat izozkiari», esan du Dimatik etorri den mutil batek.
Polenekoek –Helados Ruiz– emon die saria Euskal Herriko kamiseta azokako irabazleei. Apar & Bits-ek irabazi du Ondarroako kamiseta onenaren saria eta Eibarko Kikukok kamiseta onenarena. Ezustean hartu dute albistea, eta poz-pozik daude. «Eskerrik asko Radixuri», esan dute irriparreari ezin eutsita.
Indartsu segitu du jaiak. Umeen jokoak eta nagusienak ekarri ditu arratsaldeak: Aretxabaleta-Tolosa eta Dima-Ondarroa sokatira lehiaketak «tranpa» bat baino gehiagogaz egin dira.
Larrain Dantzak eta elektrotxarangak itxi dute kaleko egitaraua. Eta Gaztetxean, Repercusionen doinuak entzun dira.
Gaua luze joan da. Tabernak txiki geratu dira. Ezinezkoa da sartzea, ezinezkoa irtetea. Kafe Antzokian Zapato Azuleko kanta ipini dute. Jarraian, Zenbat Gara kantagaz, ateak itxi ditu. 08:10 dira.
Radixu Irratiak eskerrak eman nahi izan dizkie jaian parte hartu duten guztiei. Zerrenda IKUSGAI, HEMEN.
- Aurtengo omendua: Poleneko mantekau (Helados Ruiz).
- Kamiseta azokako irabazleak: Apar & Bits (ondarrutarren artean onena) eta Kikuko (Euskal Herrikoen artean onena – Eibar)
