Barroetako zubia eraikitzen hasteko baldintza agiria onartu du Markina-Xemeingo Udalak
Markina-Xemeingo Udalak Barroetako zubia egiten hasteko aurrerapauso bat eman du. Atzoko osoko bilkuran obra esleitzeko baldintzen plegua onartu zuen, eta orain, lehiaketa jarriko da martxan.
Orain arte, hainbat oztopo eduki ditu udalak eraikuntzagaz hasteko. Baina, orain, baldintza guztiak beteta eta hirigintza batzordean baldintzen agiria adostuta, aurrera doa proiektua.
Danetara 1.368.502,47 euroko aurrekontua edukiko dute beharrek, eta hasierako kalkuluen arabera, hamalau hilabete iraungo dutela aurrikusten da, nahiz eta gero, hori alda daitekeen.
Alde batetik, Bizkaiko Foru Aldundiaren 550.000 euroko diru laguntza edukiko du udalak zubia egiteko. Hori soberakinen poltsatik atera eta zubia eraikitzeko poltsan ezarri dute. Bestetik, gaur egun udalak daukan soberakinetik 700.000 euro ere zubiaren poltsara bideratu ditu. Falta diren 118.502,57 euroak 2014ko aurrekontutik jarriko ditu udalak.
Udalak atera duen baldintza agirian ohiko baldintzak daude jasota, baina badaude udalak gehitu dituen beste bi baldintza: alde batetik, Bizkaiko eraikuntzako langileen hitzarmena errespetatu beharko dute. Beste alde batetik, proiektua ofizialak diren bi hizkuntzetan aurkeztu beharko dute, derrigorrez.
