Inoiz plazara irten gabeko zaldiak lehian ikusteko aukera dago domekan, Aulestin
Estreinako iaz egin zuten ekimena. “Iaz bi zaldi herrikoak ziren eta bat Nabarnizkoa”. Orokorrean, iazko proba ondo joan zela esan du Josu Madariaga zaldi probetako antolatzaileak. “Iaz ondo atera zen ekimena, eta ondorioz, aurten, bigarrenez, errepikatu egingo dugu”.
Horrela, aurten ere, hiru zaldik parte hartuko dute proban: Maider Uriarteren Terry (3 urteko zaldia, 50 kiloko gainkargagaz), Belaustegiren Linda (4 urteko behorra, 80 kiloko gainkargagaz) eta Mikel Garaialde gipuzkoarraren Indiko (4 urteko zaldia, 120 kiloko gainkargagaz).
Norgehiagoka domekan egingo da, 17:30ean, Aulestiko Torrezelai probalekuan. “Ikuskizun polita izango da. Eta azken finean, hori da gure helburua: herrira ikuskizun polita ekartzea”, azaldu du Madariagak.
Izan ere, zaldiak inoiz plazara irten gabekoak izanda, probak herritarrengak kuriositatea sortzen duela dio Madariagak. “Behin eta barriro plaza ezberdinetan egon diren zaldien probak direnena, herritarrek ez dute kuriositate hori edukitzen, iada zaldia ezagutzen dutelako. Kasu honetan, ostera, iaz modura, inoiz ez dituzte zaldi horiek lehian ikusi. Horrek ikusmira sortzen du eta jendea erakartzen du”.
Iazko zaldi probako irudia, Aulestiko Torrezelai probalekuan.
Antolatzaileen esanetan, probak ikusmira sortzen du herritarrengan. Izan ere, proban parte hartuko duten hiru zaldiek (Indiko, Linda eta Terry) ez dute inoiz probetan parte hartuGuztira hiru sari banatuko dira proban: lehenengo saria 500 euro eta manta izango dira, Ilunzar tabernak emanda. Bigarren saria 450 euro izango dira eta hirugarrena, 400 euro. Norgehiagokak baldintzak ere baditu. Horrela, proban, 800 kiloko harria erabiliko dela iragarri dute antolatzaileek. “Zozketa 16:30ean egingo da eta probak Bizkaiko Herri Kirol Federakundeak kontrolatuko ditu“. Ekimena Aulestiko Udalaren laguntzagaz antolatu dute herritarrek. Eta antolatzaileek herritarrei probak ikustera gerturatzeko gonbitea egin nahi izan diete. “Etorri daitezela eta gozatu dezatela!”.
