Azken hilabeteetan gaixorik egon eta gero, Lekeitioko Uribarren Abaroa egoitzan hil da gaur.
Hileta elizkizuna eguenean, abenduak 19, izango da, 19:00etan, Ondarroako Andra Mari elizan. Hilbeila Lea-Artibai beilatokian egongo da bihar, 11:00etatik 13:00etara eta 16:00etatik 18:30era.
Ioan Arantzamendi Mugartegi
1916ko maiatzaren 26an jaio zen, Ondarroako Kantoipe kalean. Bederatzi neba-arrebatako zortzigarrena zen. Gurasoak ere, Isabel eta Nikolas, bertakoak zituen, itsasoko bizimoduagaz lotutakoak. Ondarroako Kresala dantza-taldeko ezpata-dantzaria izan zen mutikotan. Eskola utzi eta 13 urtegaz Saturrarango seminariora joan zen. Bost urte igaro zituen bertan, eta beste bi Gasteizko seminarioan. Gerra hasi aurretik, etxekoek Bilborako bidea hartu zuten, eta berak Arana Goiri batailoian eman zuen izena: “Enlaces y transmisiones” konpainian ibili zen Bizkaiko hainbat frontetan. Atxilotu eta langile-batailoietan izan zuten ia bost urtez Espainia aldetik. Herrira bueltatzerakoan, “Compañia Esperanza” autobus-enpresan hasi zen inspektore lanetan erretiratu artean. 1981. urtean ezkondu zen, eta Madrilera (Espainia) joan zen bizitzera, hangoa baitzuen emaztea. Haren heriotzaren ostean, 1995. urtean Ondarroara buelta egin zuen, gurasoen Kantoipeko etxera, sortzen ikusi eta gehien maite izan duen herrira.
Abertzale sutsua eta euskara garbizalea, bere herriaren eta hizkuntzaren alde aritu izan da beti: hainbat egunkari eta aldizkarietan argitaratu izan dira bere artikuluak, ezizen bategaz asko eta asko. Haren kolaborazioak oso preziatuak izan dira. Hizkien maisu,
Atako Bandan diskoan (1976) argitara eman zen berak idatzitako
Zuzentza abestia. Giuseppe Verdiren
Nabucco operaren euskarazko bertsioa ere egin zuen.
Idazlea ez eze, irakurle nekaezina ere izan da Arantzamendi, eta horren lekuko dira bere etxean urteetan pilatzen joan den dokumentu eta agiriak. Ondarroan egiten ziren kultur ekintzen aurkezlea ere izan zen urtea askoan. Bere ideiak pasioz defendatu izan dituen gizonezkoa izan da beti. 97 urte osasunez bete-bete bizi izan ditu.
