Fiskalak sei urteko kartzela zigor eskaera berretsi du Likona eta Gojenolarentzat

2014/01/30

Auzipetuetako batzuk, atzo, Espainiako Auzitegi Nazionalera sartzen.

Espainiako Auzitegi Nazionaleko fiskalak sei urteko kartzela zigor eskaera berretsi du Gaizka Likona eta Zurine Gojenola lekeitiarrentzat. Likonari Bizkaiko arduradun izatea egotzi dio eta Gojenolari Lea-Artibaikoa. Fiskalak ondoriok ataratzen amaitu du gaur (eguena, urtarrilak 30). Amaia Izko abokatuak alegazioak egiten jarraituko du bihar, urtarrilak 31, barikua, 10:30ean. Likona eta Gojenolari zigor eskaera berretsi modura, gainerako auzipetuentzako ere sei urteko kartzela zigorra eskatu du fiskalak. Fiskalaren esanetan, gazteek ekitaldi publikoak baliatu dituzte Segiren helburuak betetzeko. Eta argudio hori erabili zuen seina urteko zigor eskaera berresteko. Ustezko tratu txarrak ikertu zirela zalantzan jarri du Luis Barroso fiskalak, herenegun egin zuen bezala, baina, hala ere, gazteek polizia etxean egindako deklarazioak erabili zituen beren aurkako karguak arrazoitzeko. Fiskalak amaitu ostean, Dignidad y Justicia erakundearen txanda heldu zen: hamar eta hamabi urteko kartzela zigorrak eskatzeko arrazoiak eman zituen.

Dignidad y Justicia erakundeak hamar eta hamabi urteko kartzela zigorrak eskatu ditu auzipetuentzat; defentsa abokatuak auzipetuei inputatzen zaizkien ekintzak politikoak eta sozialak direla argudiatu du

Defentsako abokatuak izan ziren ondorioak azaltzen azkenak. «Alde guztiek ondorioztatu dugu pertsona hauei inputatu zaizkien ekintzak soilik politikoak eta sozialak direla», azaldu zuen Amaia Izko auzipetuen defentsak. Espainiako Auzitegi Konstituzionalaren epaiak oinarri hartuta, eskaerak ez direla proportzionalak defendatu zuen. Izkoren arabera, gazteok «talde terroristako kide» hartuko balituzte ere, aurreikusitako gutxienekoa (6 urte) desproportzionala da, indarkeriazko ekintzarik gabe. Egoera politikoa aldatu dela nabarmendu zuen, hala ere, defentsak, eta auzitegiaren doktrina ezin dela estatikoa izan, legean oinarrituta.