«Odola ematea bizia oparitzea» dela deritzote osasungintzako langileek. Orokorrean, 2013an odol emoileen kopuruan zein odol emate kopuruak behera egin du. Hala, arazo horri irtenbidea emateko deia egin du Transfusio eta Giza Ehunen Euskal Zentroak. Odolaren eskaerari arazo barik aurre egiteko, odol emaile berriak behar dituztela nabarmendu du.
Araba, Bizkaia eta Gipuzkoa kontuan hartuz gero, 2013an 95.465 odol emate izan ziren; 2012an baino 5.000 gutxiago. Odol emaileen zein odol emateen kopuruak apur bat behera egin duen arren, hala ere, Europako daturik hoberenetakoak dira bertokoak. Hain zuzen, mila biztanleko 44 odol emate inguru daude. Osasunaren Nazioarteko Erakundearen arabera, odol eskariari erantzuteko gutxieneko kopurua mila biztanleko 45 eta 50 odol emate artean dago. Hala, Araba, Bizkaia eta Gipuzkoa gutxigatik ez dira heltzen segurtasun eremu horretara.
Bizkaiko odol emaileen artean Busturialdeko eta Lea-Artibaiko herrietakoak ere aurki daitezke. Bertoko herrietako datuak, gainera, bereziki positiboak direla diote adituek.
Bizkaiko Odol Emoileen Elkartearen arabera, 2013an 2.981 odol emate bildu zituzten Busturialdeko eta Lea-Artibaiko herrietan. 2012an, bestalde, 3.187 odol emate jaso zituzten. Hala, gutxi gorabehera %6ko beherakada izan da emateetan.
Orokorrean, bertoko datuak Araba, Bizkai eta Gipuzkoako datuak baino hobeak dira. Izan ere, herri guztiek gainditzen dute hiru herrialdeen bataz bestekoa. Adibiderik adierazgarrienak Markina-Xemein eta Gernika-Lumo dira. Lea Artibaiko herrian, esaterako, beherakada nabarmena izan dute odol emateek; baina, horrela izanda ere, mila biztanleko 73,3 odol emate jasotzen ditu elkarteak.
Gernika-Lumon, bestalde, odol emateen beherakada txikiagoa izan da. Hala ere, biztanle kopurua dela eta, Markina-Xemeingo bataz bestekoa baino baxuagoa da Busturialdeko herrikoa: mila biztanleko 58,6 odol emate.
Markina-xemeinegaz batera, odol emate kopuruan beherakada nabarmena jasan duen beste herria Bermeo da. Kasu horretan, baina, badaezpadako neurri batengatik murriztu zen odol emate kopurua. Bizkaiko Odol Emoileen Elkarteak jakinarazi duenez, odola biltzeari utzi zioten hiru hilabetez, hepatitis kasu asko antzeman baitzituzten herrian.
Gernika-Lumon gehien
Eskualdeotako herriei dagokionez, bereziki aipagarriak dira Gernika-Lumoko datuak. Azken urteetan bezala, Busturialdeko herrian jaso dituzte odol emate gehien 2013an. Hain zuzen, 610 odol emailek 1.192 odol emate egin zituzten. Autobusean batutako datuei, gainera, fabriketakoak eta aferesi bidez odola emandako datuak gehitu behar zaizkie. Maier, Losal eta Cumenager enpresetan, esaterako, 135 odol emate jaso zituzten iaz; eta, aferesi bidez, bestalde, 32 odol emate egin zituzten gernikarrek.
Herriko Odolkideak elkartearen ustez, «datu onak dira», 51 odol emate gutxiago jaso dituzten arren. Hala, odol emaileen ekimenari esker, maila onari eusten diote Gernika-Lumon.
Errepikatze indizea ere nahiko ona da Busturialdeko herrian. Izan ere, Gernika-Lumoko emaileek urtean bi bider ematen dute odola, bataz beste.
Egoera, hala ere, ez da dirudien bezain ederra. Izan ere, 2000n zenbaketa egiten hasi zirenetik, 2013an lortu ditu daturik okerrenak Gernika-Lumok. 2009an, esaterako, 1.426 odol emate jaso zituen Bizkaiko Odol Emoileen autobusak bertoko herrian. Ordutik, odol emate kopuruak etenik barik egin du behera.
Odol emaile berrien bila
Busturialdeko zein Lea-Artibaiko odol emateen datuak nahiko onak izan arren, Odolkideak elkarteak aurrerapausoak emateko deia egin du. «Gutxienez, orain arteko datuei eutsi behar diegu, baina odol emate kopuruak gora egitea oso aberasgarria izango litzateke guztiontzat».
Batez ere, odol emaile gazteen arreta bereganatu nahi du Bizkaiko Odol Emoileen elkarteak, «odol eskaerari aurre egiteko eta zerbitzu publikoaren iraunkortasuna bermatzeko».
Alde horretatik, Gernika-Lumon 25 eta 45 urte bitarteko zazpi odol emaile berri daudela goraipatu du elkarteak. Hain zuzen, 2014ko hasieran eman dute odola pertsona horiek.
Odola ematea borondatezkoa da, baina «gizarte baten heldutasunaren isla» da. Hala, bertoko herritarrei odola emateko deia egin die Odolkideak-ek. «Odola ematea bizimodu berri bat oparitzearen antzekoa da». Zenbait kasutan heriotzera kondenatuta dauden pertsona gaixoak sendatzeko balio du elkartasun keinu sinple horrek.
«Odola ematea bizia oparitzea» dela deritzote osasungintzako langileek. Orokorrean, 2013an odol emoileen kopuruan zein odol emate kopuruak behera egin du. Hala, arazo horri irtenbidea emateko deia egin du Transfusio eta Giza Ehunen Euskal Zentroak. Odolaren eskaerari arazo barik aurre egiteko, odol emaile berriak behar dituztela nabarmendu du.
