2014ko aurrekontuak aurten ere atzerapenagaz onartuko direla kritikatu dio Lekeitioko EAJk Bilduri. Udal aurrekontuak, aurreko urte amaieran edo urte hasieran onartu beharko liratekela diote «herriaren beharrizanei erantzuna emateko oinarria baitira». Pasa den urtekoa ez gertatzea espero dute «aurrekontuak abuztuan onartzea».
EAJren ustez, aurtengo aurrekontuetako partida batzuk hurrengo egitasmoetara bideratu behar dira besteak beste: Eskola publikoetako kolorinetako eraikuntza hobetzera, Santa Rita edo Abaroa jauregia konpontzera, Playa de Ondarzabal eta Mendieta ontziolak berreskuratzera, Isuntza Arraun taldeko lokala konpontzera, Santi Brouard Kiroldegian eta Trinkete etxean zaharkituta dauden instalakuntzak hobetzera, Hiri debekatuaren mapan agertzen diren puntu beltzak desagertaraztera, Gizarte zerbitzuetako itxaron zerrendak ezabatzeko neurriak hartzera, haurrentzako eta gazteentzako zerbitzuen ordutegi eta egutegi zabalagoa bermatzera, euskara teknikariaren ordutegia gehitzera, eta edertze plana burutzera.
“Ganora gutxi, inprobisazioa eta kudeaketarako gaitasun eza nabari dira, hiru urtetan hausnarketan bakarrik diharduen eta ondorioz, herriaren alde inongo inbertsiorik egin ez duen gure udal gobernuan”, adierazi dute EAJkoek.
