Quincocesek bigarren postua lortu du Izabako proban
Maila ona eman dute Quincocesek Euskal Herriko kopako bigarren proba puntugarrian. Emakumezko seniorren artean Quincoces bigarrena izan da helmugaratzen zapatu eta domekako lasterketan. Zapatuan 2:08:07 denbora egin zuen mendexarrak eta sailkapen orokorrean 19. postua eskuratu zuen.
Bi eguneko mendiko eski lasterketa izan da Izabakoa, Euskal Herrian egiten den bakarra. Zapatuan bakarkako proban lehiatu behar izan zuten eta domekan berriz krono igoeran. Elurraren baldintzak direla eta antolatzaileek bi egunetako ibilbideak aldatu behar izan zituzten eta domekako probari esaterako 200 metroko malda gehitu zioten.
Quincoces gustora aritu da bi egunetan eta lortutako emaitzarekin pozik dago. «Zapatuko proban izotz asko egon da eta horrek lasterketa konplikatu egiten du, baina ibilbidea oso polita izan da eta asko gozatu dut» esan du Quincocesek.
Hurrengo proba, martxoaren 15 eta 16ko asteburuan izango da Picos de Europan.
