Etxegabetzeen kontrako protokoloa onartu du Munitibarko Udalak
Etxegabetzeen kontrako protokoloa onartu du Munitibarko Udalak. Protokolo honetan jasotako neurrien bitartez, egoera «larri» horren aurrean daudenei laguntza praktikoa eman gura dio udalak. Horrez gain, etxegabetzeen kontrako sistema bidegabea dela uste du udalak eta onartutako protokoloa, sistema horri aurre egiteko baliagarria dela pentsatzen du.
Protokoloa onartuta, udalak era horretako egoeretan hartuko duen jarrera zehaztu du. Horrenbestez, instituzioen eta etxegabeetzeen aurka ari diren elkarteen arteko elkarlana sustatuko dute Munitibarren, eta beharrezkoa den kasuetan, gaiaren lanketarako udal batzorde berezi bat antolatzeko bidea zabalik laga dute. Horrez gain, udala, etxegabetza edo antzeko arazoak izan ditzuten herritarrei zabalik dagoela jaso dute adostu berri duten protokoloan. Hori dela eta, udala, herritarren aurkako etxegabetze prozedura martxan duen bakuarekin harremanetan jarriko dela zehaztu dute, beti ere, prozedura denbora mugagabean bertan behera uzteko eskatu eta kaltetuaren aldetik jasotako proposamenak bankuari helarazteko. «Etxegabetzeen gaiarekin duten jarreraren arabera kreditu entitatearekin dugun harreman instituzionala, ekonomikoa eta elkarlana berrikusko ditugu» gaineratu du.
Salaketa kalera
Etxe barik geratu diren herritarrek etxebizitza eskubidea onartua izan dezaten, «informazioa, laguntza juridikoa eta lehen arreta eskainiko diogu» azaldu du.
Bukatzeko, etxegabetze guztiak kalean salatzea adostu dute. Beraz, herrian etxegabetze prozedura bat gauzatzen den bakoitzean, egunean bertan, herri eragileekin batera, udalak kontzentrazioa egingo du herriko plazan.
