Euskal Herriko itzuliko antolatzaileek eta Markina-Xemeingo Udalak itzulia antolatzeko hitzarmena sinatu dute gaur goizean Markina-Xemeingo udaletxean egindako ekitaldian. Bertan egon dira Julian Eraso Euskal Herriko itzuliko antolatzailea, Juanjo Txurruka Markina-Xemeingo alkatea, Joseba Iraolagoitia Kirol zinegotzia eta Amets Txurruka Caja Rural-Seguros RGA taldeko txirrindularia.
Apirilaren 7tik 12ra jokatuko da Euskal Herriko 54. itzulia, eta azken etapa biak Markina-Xemeinen izango dira: apirilaren 11ko etapa bukaera eta apirilaren 12ko erlojuz kontrako proba, itzuliko azkena. Itzulia Markina-Xemeinen izanda, aukera aprobetxatuko du udalak Amets Txurruka txirrindulariari omenaldia egiteko. Itzuliko antolatzaileen eta Markina-Xemeingo Udalaren ahalegina eskertu ditu Txurrukak. “Horrelako itzuli bat antolatzeko diru asko eta lan asko egin behar da eta eureri esker daukagu gure amets bat betetzeko aukera, Euskal Herri mailan egiten den proba garranttzitsuenetako bat, munduko txirrindulari onenak batzen dituena, etxean izateko aukera”.
World Tourreko hemezortzi taldeak hartuko dute parte lehian eta ahalik eta lasterketa onena ekarriko dutela azpimarratu du Julian Erasok. Amets Txurrukaren Caja Rural-Seguros RGA taldea ere bertan egongo da. “Iaz mailot bi jantzi zituen Txurrukak; aurten motibazioa badauka eta zorte apur bategaz ea podiumean ikusten dugun”, adierazi du Euskal Herriko itzuliko antolatzaileak.
Ikuskizunagaz gainera, eragozpen batzuk ere ekarriko ditu horrelako kirol proba garrantzitsuak. Barikuan, lasterketa ailegatzen denean, errepideak moztuta egongo direla jakitera eman dute antolatzaileek. Baina, zapatuan izango da batez ere arazoa, 13:00etatik aurrera, Markina-Xemein eta inguruko errepideak itxita egongo dira eta. Lasterketa ikustera datozenek Etxebarriko Galartza industrigunean utzi beharko dute ibilgailua. Autobus txikiak jarriko ditu udalak Etxebarriko aparkalekutik Markina-Xemeinera joateko. “Ibilbidera ikustera doazen zaleak ere ordu batzuk aurretik egon beharko dute bertan”, azaldu dute antolatzaileek. Bestalde, Kareaga industrigunea zabalik egongo dela argitu du alkateak, 13:00ak baino aurretik datozenentzako.
Itzulia ailegatu bitartean, sortu daitezkeen zirkulazio aldaketak azalduko ditu udalak, auzoz auzo.
Markina-Xemeingo lehenengo etapa, Eibar eta Markina-Xemein artekoa izango da, bigarrena berriz, erlojupekoa. Barikuan, gutxi gora-behera 17:30ean amaituko da lasterketa, zapatuan, ostera, 16:25ean irtengo du udaletxe aurreko plazatik azken txirrindulariak. Txirrindularien irteera udaletxe aurreko plazan izango da, Goiko Portalean. Helmuga, ostera, frontoi nagusiaren parean izango da egun bietan.
Markina-Xemeingo Udalak hainbat laguntzaile izan ditu antolaketan. Eskualdeko beste udal batzuek ere parte hartu dute, Aulesti, Berriatua, Etxebarria, Lekeitio, Ondarroa, Munitibar eta Ziortza-Bolibarko udalak, hain zuzen ere. Enpresen atalean, hamazazpi izan dira laguntzaileak. Juanjo Txurruka alkateak guztien ekarpena eskertu du.
