Kobak irabazi ditu Aulestiko zaldi mando probak
Kobaren zaldia izan da 2013ko Euskal Herriko zaldi eta mando probetan untza gehien egitea lortu duena. 76 untza eta 1,95 metro egin ditu Aulestikoaren zaldiak, bigarren sailkatuak baino untza bat gehiago. Bigarren saria Juan Erauskinentzako izan da bere zaldiak 75 untza eta hiru metro egin ostean eta azken postuan geratu da Maider Uriarte 69 untza eta erdi egin eta gero.
Beste behin ere, herritar ugari batu da Aulestiko probetan. Hamaika zaldi izan dira lau egunetan zehar lehiatu direnak.
Domekan 18:00etan eman zioten hasiera Euskal Herriko 2013ko zaldi mando proben txapelketari Aulestiko frontoian.
Sariei dagokienez, untza gehien egitea lortu duenak, 750 euro , manta, txapela eta garaikurra eskuratuko ditu. Bigarrenak,700 euro eta bi pentsu saku eta hirugarrenak 650 euro eta bi pentsu saku.
Abereen oinarrizko pisua, 400 kilokoa izan da eta beraz, goranzko kilo bakoitzeko kiloko karga hartu dute parte hartzaileek.
Martxoan proba gehiago
Datorren martxoaren 22,23,29,30 eta 31n 2014ko Euskal Herriko zaldi mando proben txapelketa jokatuko da Aulestin, udalak antolatuta. Izena emateko epea zabalik dago eta parte hartu nahi duenak udaletxera deitu beharko du (946279006). Probetan parte hartzeko martxoaren 9a orduko izena eman behar da. Parte hartzaileek, 900kiloko Aulestiko Harri Barriari tiraka ibili beharko dute. Abereen oinarrizko pisua berriz, 400 kilokoa izango dela jakinarazi dute antolatzaileek eta beraz, goranzko kilo bakoitzeko kiloko karga hartu beharko dute.
