Konposta egiteko aukera izango dute Berriatuan
Herritarrek banaka nahiz taldeka konposta egiteko aukera izango dute Berriatuan. Hori dela eta, bere etxe edo auzoan konposta egin gura duenak, Berriatuko Udalean (946137030) eman beharko du izena, martxoaren 11 baino lehen.
Hondakinen tratamenduari buruz hasitako bidearekin jarraitzeko, materia organikoa tratatzeko edo jasotzeko aukerak aztertu ostean, herrian auto-konposta edo auzo-konposta egitea erabaki du Berriatuko Udalak. Horretarako lehendabizi, bere etxe edo auzoan, konposta egiteko prest dauden herritarren kopurua zein izango den jakin gura du udalak. Proposamenaren berri gutun baten bitartez jaso dute herritarrek. Udalak, birziklapena eta konposta bultzatuz, hondakinek eragiten duten kaltea murriztea lortuko dutela dio baina horretarako guztion ahalegina beharrezkoa dela esan du eta bide horretan, herritarrak konposta egitera animatu ditu. Horretaz gain, gai honen inguruan sortutako edozein zalantza argitzeko udalera hurbiltzeko gonbitea egin die herritarrei.
Konposta egiten ikasteko
Zerrenda osatutakoan, parte hartuko duen herritarrek, konpostari buruzko formazioa jasoko dute. Behin konposta egiteko zehaztasun guztiak ezagututa, konpostagailuak banatuko dituzte etxeetan, etxe bakarren kasuan, eta auzo konpostagailuak ipiniko dituzte herri gunean. Oraindik auzo konposta egiteko guneak zehaztu gabe daudela azaldu du Imanol Mugartegi Berriatuako alkateak. «Lekuen inguruko ideia batzuk zehazten ari gara udalean baina izena ematen duen jende kopurua zein den jakin arte ezin dugu erabaki non eta zenbat konpostagailu jarri behar diren herrian» azaldu du Mugartegik.
Etorkizuneko bilketa sistema
Oraindik ez dute erabaki zein izango den Berriatuan etorkizunean ezarriko duten zabor bilketa sistema.Orain arte zaborraren gaia eztabaidatzeko egin dituzten herri batzarretan materia organikoa biltzeko zabor ontzia, konpostajea eta atez ateko bilketa sistemak aztertu dituzte. Aukera horien artean, aukerarik egokiena bostgarren zabor ontzia ezartzea izango dela aurreratu du Mugartegik. «Konposta egin gura ez duenarentzat materia organikoa biltzeko zabor ontzia jartzea aztertzen ari gara» gaineratu du. Ezer zehatzik ez badakite ere, momentuz konpostari helduko diote Berriatuan, udalaren esanetan, beste sistema guztiekin bateragarria delako. Orain arte batzarretan hondakinei buruz berba egindakoa udalak bere web orrialdean jarri du ikusgarri.
