Egoera horri ahalik eta arinen irtenbide bat bilatzeko helburuagaz, talde ekologistak zabor hori jaso,
zaborra bota dutenak identifikatu eta berriro halakorik gerta ez dadin neurriak hartzeko eskatu dio Ondarroako Udalari.
Ekologistek esan dutenez, orain dela bost bat hilabete konturatu ziren Santana baserritik Errenteriarako bidean zaborrak zeudela, orain dela urte batzuk Eroski egitekoa zen tokian, hain zuzen. Orduan, baina, hiruzpalau traste baino ez zeuden han. «Ez zegoen hainbeste zikin», diote.
«Orain, baina, gehiegizkoa da».
Zabortegiek eragiten dituzte kalteak handiak direla ohartarazita, jendeari garbi jokatzeko eskaria egin diote. «Atxazpin ere gauza bera gertatu zen, bertan pilatutako zikina itsasora jausten ari da. Zabortegiak denontzat dira kalte bat, kalte handi bat». Horri lotuta, gogoratu dute Markina-Xemeinen dagoela Garbigune bat, eta trasteak bertara bideratu behar direla. Izan ere, jendeak edozein egunetan ateratzen ditu traste zaharrak, eta udal brigadek kendu behar izaten dituzte, euren lan orduetan. Hori jakinda, baina, «arraroa» irizten zaie norbaitek zamarrak Errenteriaraino eramatea: «Zeinek hartuko du trasteak Errenteriara eroateko lana?».
Traste zaharrak zelan atera
Lea-Artibaiko Amankomunazgoak emandako telefonora –94-613 82 45– deitu behar da etxean sortzen diren traste zaharrak batzeko, eta bertan mezu bat utzi. Eurak ipintzen dira herritarrekin harremanetan, trasteak noiz eta zelan atera esateko.
