Hondakinen kudeaketaz herri galdeketa bat egiteko bideari ekin diote Mutrikun

2014/03/03

Joseba Palenzuela alkateak proposamen bat helarazi dio oposizioari azken osoko bilkuran, galdeketaren inguruan urratsak egiteko. Alkateak jakinarazi duenez, jadanik lanean ari dira, eta negoziazioak hasiko dituzte orain.

Proposamenak hiru ardatz nagusi izango ditu: batetik, hondakin batzorde berezi bat sortuko da; bestetik, parte hartze prozesu bat abiaraziko da hondakinak biltzeko sistema ezberdinen gaineko informazioa eskaintzeko, bai ikuspegi teknologikotik, bai ekonomikotik; azkenik, herri galdeketa bat egingo da. Galdeketa, baina, ez dute atez atekoaren eta bosgarren edukiontziaren arteko lehia batera mugatu nahi. «Herritarrei eskura dauden aukera guztien berri emango diegu. Informazio saioak antolatuko ditugu, jendeak zehatz-mehatz jakin dezan sistema bakoitzak dituen abantailak eta desabantailak», azaldu du. Palenzuelak eredugarritzat jo ditu Gipuzkoan abian diren edo laster jarriko dituzten sistemak: Arrasateko eta Legazpiko kasuak aipatu ditu. «Gurean zergatik ez horrelako zerbait? Ikusi egin beharko da aurrerago, baina herritarren borondatea errespetatuko dugu». Alkate modura, herrian eztabaida antzurik ez duela nahi esan du. “Gure arteko borrokak zulo beltz batera eramango gintuzke, eta herriak ez luke hori ulertuko. Gure betebeharra mutrikuar guztiok batuko gaituen bide bat topatzea da”.

Mutrikuko alkateak esan du oraindik ere «goizegi» dela epe zehatzez eta gutxieneko birziklatze tasez hitz egiteko. Lehenbizi, adostasuna lortu behar dutela adierazi du. Hala ere, ez da batere ezkor mintzo, gainerako udal taldeek dagoeneko begi onez ikusi baitute proposamena: alderdi guztien aldetik harrera ona izan du, eta denon artean iniziatibak aurrera egingo duelakoan gaude”. Horrenbestez, uste du “berandu baino lehen” ados jarriko direla. «Eta herriak eskertu egingo du». “Guztiok gure posizioan irmo segitzen badugu ‘jai daukagu'”, esan du, alderdikeriak alde batera utzita irtenbidea “adostasunetik” etorriko dela nabarmenduta. “Garrantzitsua ez da ze alderdik irabazten duen. Herriak irabazi behar du, herriak atera behar du etekina gai honetan. Azken finean, garrantzitsua birziklapena ondo egitea da. Zenbat eta batuago ekin, emaitzak hobeak izango dira”.

Gure arteko borrokak zulo beltz batera eramango gintuzke, eta herriak ez luke hori ulertuko. Gure betebeharra mutrikuar guztiok batuko gaituen bide bat topatzea da”

Palenzuelak jakin badaki mugarri bat izan daitekeela, legealdi honetako udal batek antolatutako aurreneko galdeketa izango bailitzake.

EAJ, bosgarren edukiontziaren alde Mutrikuko EAJren udal taldeak bere burua zoriondu du Bilduren udal gobernuak galdeketa prozesu bat aurrera eramateko erabakia hartu duelako, “mutrikuarrek hondakinen bilketaren sistema erabaki dezaten”. Joseba Antxustegi jeltzaleen bozeramaileak esan duenez, gauza asko eztabaidatu eta adostu beharko dituzte. Antxustegik “egiazko” galdeketa bat egitea espero du, hauteskunde klabetik haratago doana eta mutrikuarrak nahastuko ez dituena. Amaitzeko, azpimarratu du “herritarren gehiagoak hondakinak murrizteko eta gaikako birziklatze tasak handitzeko apostua egiten duela, Hori bosgarren edukiontziarekin lor daitekeela defendatu du.