2014ko aurrekontuen lehenengo proposamena aurkeztu ondoren, herritarren ekarpenak jasotzeko tarte bat zabaldu du Lekeitioko Udalak. Aurrekontuen zirriborroa udalaren webgunean eskegi dute, eta martxoaren 10era arte egongo da proposamenak egiteko aukera.
Aurrekontuak hiru taldetan banatu dituzte: udalari dagokionak, eta kirol eta kultur patronatuei dagokienak. Proposamenak udaletxean utzi beharko dira edo partehartzea@lekeitio.com helbidera bialdu.
Aurreikuspen hobeak
Udalak jakitera eman duenez, aurtengo aurreikuspenak baikorragoak dira aurreko bi urteetakoekin alderatuz gero. Errekaudazioa igo egin da zer edo zer, eta ondorioz, diru sarrera gehiago ditu udalak. Errakaudazioaren igoera aurrekontuetan isladatzeko Plan Ekonomiko Finantziario bat egingo dute. «Hori egiten ez bada aurtengo aurrekontuetako sarrera hori zuzenean bankuko kreditua amortizatzeko erabili beharko litzateke, eta ez herrian beharrezkoak diren inbertsioak egiteko», azaldu dute.
Inbertsioak herritarrei zuzenean eragiten dieten azpiegitura eta zerbitzuetara bideratuko dituzte. «Inbertsioak herritarrek jakinarazi dizkiguten beharrizanei erantzuna eman nahi diete; udal honek ez ditu lekeitiarrei zuzeneko zerbitzurik emango ez dien azpiegitura handiak sortuko».
Inbertsio guztiak egin ahal izateko Garabilako garaje batzuk saldu, diru laguntzak lortu eta aurrekontuak optimizatu beharko ditu udalak.
Ekarpenik balego aurrekontuen bigarren azterketa bat egingo dute, bestela zuzenean osoko bilkurara joko dute, aurrekontua onartu eta indarrean jartzeko.
